喺內地好紅、有「學術超女」之稱嘅于丹抵港，噚日現身書展座談會，佢俾內地傳媒選為「中國第三美人」，八方見過佢真人，發現一國兩制，兩地真係仲有好多嘢唔同。估唔到于丹喺香港都有幾多擁躉，座談會主題係《論語》、《莊子》的生活智慧，于丹靠呢啲經典響朵，侃侃而談冇難度，香港人聽多碗心靈雞湯都冇壞。
于丹𠵱家全國聞名，有人問佢點樣教仔女，第日有佢咁叻，于丹話自己喺文革後期出世，係獨生女，由外婆湊大，細個時冇人強迫佢讀《論語》或者背誦古文，最多係寫吓毛筆字，玩玩吓就一日，所以佢認為父母唔好太管束子女，等佢哋自由發展，長大後自然知道要行邊條路。