自從舊年尾搶走人哋「K寶」鎮台嘅英國超級聯賽播映權之後，8號仔嘅now定過抬炸彈，但要做行頭一哥，斷唔可以話坐喺度就做到，所以上至董事總經理艾維朗，下至街霸都唔敢怠慢，見就快8月開波，噚日佢哋公佈埋應該係最後一道嘅撒手鐧──高清（highdefinition）播波！
Incharge嘅8號仔電視業務董事總經理梁德昇話，現有客仔可以優先登記安裝now嘅高清服務，喺nowSPORTSHD頻道收睇至少90場高清制式直播嘅英超賽事（當然仲有其他體育節目），咁要睇正嘢就梗要付出代價，例如每個月要畀多幾十皮租新嘅高清解碼器，而「超強體育組合」客仔就可以用優惠價68蚊（原價88蚊），享用高清體育頻道組合服務……之不過咁，閣下畀多幾多銀都好，都只會係有「體育」冇「睇肉」，事關梁董強調，佢哋係專業播波，絕對唔會有啲短裙仔angel……「睇肉家」要留意！
自家新聞台跟住出爐
梁董又話，下個禮拜巴克萊亞洲錦標賽，佢哋呢個大會指定電視台會以高清制式炮製呢4場賽事，仲會向全球130個國家/地區直播，亦會安排喺6間門市播放，27號又喺青衣城搞大電視睇波，等市民feel吓高清有幾正！
講開又講，噚日探子報料話「K寶」同國家地理頻道份約就快到期，但九成九唔會續，遲啲得番now、香港寬頻同無線收費電視有得睇。查實好多人鍾意睇國家地理頻道，連兩個弱家都有嘅時候，再加埋now喺10月就會推出自家製嘅新聞台，「K寶」，你到底想點呀？唔通諗住齋捱打？
[email protected]