李家誠和徐子淇的千億B女自周二出世後，昨日首度曝光，果然如爺爺李兆基所言似爸爸有高高的鼻樑，子淇第一眼見到囡囡就感動得不停流淚，抱着BB女一臉的慈藹，不過她未及老公「專業」。李家誠不但陪太太入產房、拖着她的手等BB出世，還餵奶、沖涼一腳踢，果然是超級爹哋！
徐子淇為恒基二公子李家誠（Martin）誕下重7.8磅千億B女，連日來仁安醫院及位於中環國金的恒地總部均有大批記者等候，BB出世四天，新任爺爺四叔李兆基雖然仍未親自探望，但已表明子淇生十個八個更好。昨日上午9時左右，恒基兆業企業傳訊部總經理顏雪芳（Bonnie）向在場守候的記者說：「知道大家等得好辛苦，李家誠同徐子淇會考慮發相畀大家，大家有乜要求、有嘢想問嘅，睇吓Martin會唔會回應幾句。」
下周出院
準備靚樣再見大家
下午2時Bonnie再次出現時，記者追問Martin會否聽爸爸李兆基的說話生多幾個，Bonnie轉述Martin的回答是「一定會」，她說：「我見Martin好開心，知佢一定會再生小朋友。佢呢幾日一路喺醫院陪住太太，佢包咗醫院半層樓，夜晚陪太太過夜。」問徐子淇何時出院，Bonnie說：「冇咁快，佢開刀生嘅嘛，見人都要靚靚咁先出嚟，下個禮拜先出院。」
為了在場苦苦守候的記者，李家誠和徐子淇一家三口昨日特別拍了合照給傳媒。照片所見，BB果然如李兆基所言，鼻哥高似爸爸，手抱BB女的徐子淇，則流露一臉慈愛、幸福和滿足，羨煞旁人。記者向李家誠夫婦的提問，傍晚6時許由Bonnie轉述回答記者，她說：「BB未改名，中、英文名都未改，李太喺有咗三個月時，已經買咗好多BB書嚟睇，但都搵唔到一個啱嘅英文名，所以決定等BB出咗世，望吓佢個樣、睇吓佢嘅性格先決定改乜名。」
為母心情
子淇前所未有興奮
李家誠有否陪徐子淇入產房？Bonnie說：「李生有陪李太入手術室，李太半身麻醉，大家都好期待BB嘅出世。李生拖住李太隻手，當時嘅環境好靜，跟住就聽到BB嘅喊聲，李太睇咗BB一眼，就控制唔住不停流眼淚，講咗句『最緊要BB健康』，第二眼望完，李太話『好似Martin，直情係miniMartin』。李太話佢生完BB嘅心情係前所未有咁興奮，無論結婚、做嘢都未試過有咁興奮嘅心情，感覺完全唔同，而李生就好開心又感動。」
李家誠可覺得太太生BB很辛苦，會否有甚麼獎勵給太太，Bonnie轉述李家誠的答案道：「梗係辛苦啦，獎勵就出咗院先算啦。李太就話BB已經係送畀佢嘅最好禮物。」BB出世後發生過甚麼趣事？Bonnie說：「李太唔係餵人奶，Martin係好專業嘅爹哋，佢餵奶好叻，抱BB嘅手勢都叻過媽咪，李生曾經幫過BB沖涼，反而媽咪因為開刀，暫時都未幫BB沖涼，不過李太無時無刻都咁掛住BB。」
B女頭大
50厘米被迫開刀
提到徐子淇剖腹產女，是否因為擇了時辰，Bonnie說：「因為BB嘅頭比普通BB大，安全起見所以要剖腹，正常BB全身係40cm，𠵱家BB有成50cm（約1呎8吋）。」問徐子淇現時能否正常進食，Bonnie說：「佢食到嘢，已經好咗好多，不過傷口仲有啲痛，但已經落到床。」
記者問Bonnie李家誠是否真的打算三年抱兩，她說：「佢哋會努力嘅啦。李生抱BB，BB就唔喊，其他人抱都會喊。我噚日見到BB，BB肥嘟嘟，輪廓好靚，佢塊面上半截似爹哋，下半截似媽咪，眼同鼻都好似爹哋。」Bonnie透露爺爺李兆基因為工作忙暫時還未前來探望BB，反而徐子淇的父母以及很多親戚都已來探望過。
採訪：胡比、王連連
攝影：娛樂突發組
最高蘋嬸
李家誠同徐子淇個女到𠵱家都未改名，計我蘋嬸話不如叫李澤佳，咁樣咪可同李嘉誠、李澤楷兩父子互相輝映囉！
蘋果娛樂特派評述員蘋嬸
一網講盡：內地網友遙距改B名
李家誠和徐子淇誕下千金是城中大事，連日來被香港傳媒廣泛報道，內地網友也十分關注，在網站發起「給徐子淇李家誠的千金取小名」的帖子，300多位網友熱烈回應。
不少網友真誠祝福李家千金，有人提議改名「李家棋」，各取父母名字中的一個發音，以見證李家誠和徐子淇的愛情；有提議「李徐寶兒」，因她是李家誠和徐子淇的寶貝，「李善美」，希望她長大後善良、美麗、快樂。
部份名字是取材自李家誠富有的家底，「李幸兒」，因為她太幸運了，出生這麼好的世家。「李億金」、「李淘金」，因為她一生下來好象就是來淘金的。
http://go.ent.163.com/becility/detail.jsp?id=66
