新地（016）近年發展嘅項目，好多都對市場帶嚟衝擊，例如喺03年落成嘅中環國際金融中心二期，喺02至03年經濟低潮時，一直成為中區甲級商廈嘅隱憂，預租時仲掀起租戶挖角潮，好在沙士後經濟回升，最後租金仲升到破紀錄，𠵱家國金二期呎租近170元。
新地喺尖沙嘴九龍站上蓋嘅ICC（環球貿易廣場），總樓面250萬呎，今年底至2010年分期落成。第一期90萬呎，意向呎租35元。呢件巨無霸唔使講又會帶嚟一場挖角風暴，連彭博都寫埋一份。彭博話聽兩個直接知情人士講，由87年已落腳中環，現喺交易廣場嘅大摩（𠵱家租緊20萬呎），傾緊搬去ICC，最多揀租18層，以ICC每層3.5萬呎計，即63萬呎。彭博搵埋新地求證，但得個行貨答案：不予置評。
由於中環寫字樓供不應求，就算大摩真係搬去ICC，相信對中環甲級寫字樓大業主嚟講，係好消息多過壞消息，因為租畀大租客呎租通常平啲。