纖體減肥公司成行成市，新聞又經常見到女仔減肥減到暈，究竟男士係咪真係唔鍾意女友肥呢？迷你論壇網民「吾係好人」十分困擾，因為女友肥胖，肚腩似有三個月身孕，卻經常穿上背心熱褲：「如果你係佢男朋友，你會唔會叫佢唔好咁着，或者你會點？」結果不少網友都批評瘦女「唔好攬」，認為「肥少少冇問題」，但都應該向女友提示一下。
網友「旦旦」認為應該向女友提意見：「佢係要咁都冇法㗎！鬼叫佢係女朋友！」其他網友建議每次見面都「踩低佢」，女朋友自然會下決心減肥，也有網友建議他換畫：「下次搵個瘦到成排骨咁囉！」網友「＊阿細」最搞笑：「叫佢唔好出街，留番喺屋企安胎啦！」
「肥肥哋先有肉地」
不過，「Mavis」認為三個月身孕並不太肥：「講真，我覺得排骨着衫都唔好睇同唔好攬。」「gr550」同意：「少少肥我鍾意，太瘦先唔好睇呀！」「黑天使力姿」笑說：「肥肥哋先有肉地。」
女網友「戀情」直言：「我就係嗰啲肥女仔，成日着短褲，哈！」「Leewan＊＊」則非常感慨：「如果喺外國，着到啲衫突出個肚腩，都冇人會話佢，冇人會用鄙視或奇特嘅眼光去望佢，喺一個咁開放嘅環境底下，梗係唔介意啦！」