飛機陳再次出版新書，喺星期一於灣仔天地圖書舉行新書發佈會。左丁山收到邀請函，本想出席，但係撞正當日下午在沙田有一個重要會議，趕唔切在五點半左右去到灣仔，惟有作罷。
飛機陳出書，不為名利，只作善事，佢本新書《獅城畫意》嘅版稅，會捐畀兩個慈善團體，其一係「國泰愛心兒童輪椅庫」，其二為「恩光之友會」，分別為患上肌肉萎縮症及智障兒童提供輪椅與教育。因為咁，左丁山唔好意思問飛機陳攞書，自行郵購可也。
飛機陳在國泰服務多年，全世界去勻，每到一個城市，就將旅遊觀察所得，寫成短文，集而成書。呢本《獅城畫意》乃係新加坡小品，講述佢在獅城工作時之所見所聞，有一啲十分有趣。
譬如驅蛇。新加坡地處熱帶，雨多樹多，草木茂盛，最宜蛇居。飛機陳所住大廈範圍內，經常有蛇出沒，不勝其擾。有人建議養鵝防蛇，因蛇怕鵝糞，加上鵝見蛇即呱呱叫，如響起警鐘，令住客知所趨避，但有人反對，因為鵝隨處便溺，易污染環境，況且日夜呱呱呱，甚為煩擾。大家爭論不休，又話養狗養貓……卒之有人話：「不如貼上標語話：此處有華人」，蛇見到會立即走開，何解呢，蛇知道華人鍾意食蛇，吞蛇膽，蛇聞到華人陣體味，就會自動消失喎！
左丁山以為，不如寫明「廣東人在此」，廣東人食盡天下動物，凡係在地上爬行嘅，走動嘅，飛上天嘅，都視之為美味，唔怕食落肚。北方人邊度識食蛇呀！據講洞庭湖有田鼠為禍，皆因農人墾荒太甚，趕絕黃鼠狼與水蛇之故，田鼠因此橫行無忌，任捉唔嬲。捉嚟做乜？運去廣州當野味賣，畀廣東人食之哉！
飛機陳拜拜國泰之後，出任太古（中國）主席，為太古拓開中國市場，任重道遠，以後飛機陳只在中國活動，一年後大概可以出版另外一本新書，講吓洞庭湖驅鼠！以佢腦筋之靈活，計仔之多，太古（中國）豈止在中國賣汽水！