前日港股上升雖然冇大成交配合，但技術走勢就好番好多，撞啱花旗股市反彈，昨日港股就大升275點收市，不過，港股收市後人行宣佈加息0.27%，咁下禮拜港股會唔會受影響？
股市係炒「預期」嘅，仲係炒「別人嘅預期」，早兩日公佈GDP同通脹數據之後，好多人都預咗呢個周末國內會加息或者仲有其他宏調措施，𠵱家人行加息0.27%，幅度無超出呢個慣常嘅範圍，減利息稅亦係預咗，即係話今次推出嘅措施係意料之中，之前國內股市炒唔起，港股亦跌咗啲，應該乜都反映晒嘞，下禮拜國內股市同港股都可以睇好，炒上嘅藉口當然係「利淡消息已經消化」。
花旗股市都要睇實，因為次按危機仲會令好多人擔心，不過，前晚道指企喺14000收，markettalk個個話要炒業績，睇嚟要升多浸先至會出現調整，如果昨晚升多一百幾十點，必定會助長港股好友下禮拜一嘅氣焰，恒指好有機會試23500。「六行三保」會再受追捧，同時係恒指成份股嘅股份有着數，走勢較好嘅就有建行（939）同國壽（2628）。
建行C輪9589：建行昨收5.99元，調整咗一個禮拜有多，終於轉番強勢，升番上10日線，成交亦多番，睇個勢可以突破6.20元，再推向6.80元。可以買啲建行C輪9589，隻輪昨收63仙，槓桿率9.5倍（有效5.8倍），正股升上6.80元，9589應該唔會低過1.20元，搵溢價低啲嘅，可以諗吓9588，正股升到6.80元，9588料有8成半升幅，正股跌穿5.75元止蝕。