劉德華噚日喺台北舉行「貓空纜車愛的叮嚀音樂會」，宣傳佢張新國語碟《一隻牛的異想世界》，他先帶15個孤兒院嘅小朋友試坐新開的貓空纜車，做第一個乘客。
之後華仔又喺貓空嘅指南宮站唱新歌，雖然噚日台北氣溫高到38度，但音樂會未開始，已吸引3,000人到場排隊等睇華仔，仲要出動300個義工同保安維持秩序。
送CD慰問
不過，華仔上山途中，貓空纜車就發生小意外，有個乘車上山嘅遊客，唔小心將手提攝錄機從吊車上跌落山，掟中一個女途人，搞到佢即時頭破血流要送院救治，仲縫咗五針。華仔唱完歌後返酒店，睇電視新聞先知件事，查得傷者係佢歌迷，華仔即派人送簽名CD去佢屋企慰問。
此外，華仔接受商台錄音訪問，講起新戲《兄弟》只有四虎獨欠梁朝偉，佢話係因為金錢問題，絕對唔係外間所推測嘅是是非非，佢話：「初頭導演話搵五虎，我就同佢講budget得2,000萬，如果要搵偉仔，佢就要度掂條數。」
