一連七日嘅書展開鑼，工銀亞洲（349）董事暨副總經理黃遠輝（Stanley），今年都有本名為《金錢以外》嘅新書出籠，雖則唔係第一次出書，但就係首次處男下海──搞簽名會。佢同華華講，前一晚都擔心冇人捧場，仲講笑話諗過出錢搵人做媒，好彩現場人氣十足，排頭位嘅杜小朋友，未夠鐘已經企定定等嘞！
見到有8歲半嘅小粉絲搵自己簽名，黃遠輝梗係開心，仲同對方傾咗好耐偈，問問吓先知，原來對方係代父到場攞簽名，而位小朋友嘅爸爸仲係Stanley嘅銀行同事，華華問粉絲仔，點解爸爸唔喺公司直接畀本新書黃遠輝簽，佢笑笑口話：「爸爸面紅囉！」
今次出新書，Stanley話科款買咗200本，送畀親朋之外，喺佢本書入面出現過嘅人物，都會收到，若果賣得好嘅話，收益會捐去雲南起學校。同好多賓架一樣，Stanley暑假會去旅行鬆一鬆，下個禮拜二同老婆北上九寨溝，月尾先再返港。