官場玩完音樂椅遊戲，最近又有新嘢玩，就係好似「大富翁」遊戲咁玩屋仔，暑假流流長，政務司司長唐英年同財政司司長曾俊華一齊玩搬屋，分分鐘忙過搞政改㗎。鬍鬚曾噚日學上司兼老友煲呔開blog，第一篇網誌就自爆日前同太太去南區壽山村道財爺官邸睇樓，準備搬新屋。
新居由曾太話晒事
佢太太似乎對新屋企好緊張，小至窗簾顏色，大至傢俬款式同擺設布置，都親自督師做話事人，鬍鬚曾帶自己個人入去住就得。外界對新財爺夫人認識唔多，鬍鬚曾話太太素來唔喜歡面對傳媒，但𠵱家都漸漸習慣面對閃個唔停嘅鎂光燈同記者追問。
財爺官邸有成70年歷史，總面積達3,671平方米，由於歷年財爺遷入前都會翻新，所以內櫳唔會舊得去邊。據聞鬍鬚曾睇過樓認為ok，可能油吓油就算，唔介意傢俬用番上手貨色，總之盡量唔好大興土木少變動，費事俾人鋤佢花錢豪裝，唔似得煲呔咁，喺禮賓府整個錦鯉池、阿松就喺官邸整個迷你影院。
八方聽聞鬍鬚曾可望喺暑假期間入伙，邊日就未確定，相信8月尾居多，事關上手用家唐英年最快月底先遷出交樓，鬍鬚曾下個月初又要為APEC去澳洲開會，短期內都冇時間搬屋。
唐唐搬入山頂維宮
由於唐媽媽認為財爺府太細唔夠住，所以唐唐主要用嚟宴客。唐唐做CS，就要「搬」上山頂白加道VictoriaHouse政務司司長官邸，據聞唐英年今次好爽快，一早決定要搬入官邸，可能覺得山頂維宮官邸面積（同派頭）先夠大。
肥龍做CS一直堅拒由禮頓山搬上山頂，所以唐唐應該隨時可以入伙，至於新屋布置由大唐太定細唐太話事，有官場中人笑言係司長辦公室機密，爆咗出嚟可大可小㗎。財政司司長官邸可能真係風水好，煲呔住到扶搖直上不在話下，阿松雖則中途落馬，但都喜事重重，娶妻兼生女；唐英年唔住都沾到旺氣，鬍鬚曾入主，下一站係……呢個真係好難講，事關下一round搬屋遊戲，最快五年後先揭盅，而呢個遊戲，八方同大部份香港人一樣，冇份擲骰，得個睇字。