Car通：Peugeot207CC開篷版終到港<br>揸小黑獅上山劈彎

Car通：Peugeot207CC開篷版終到港
揸小黑獅上山劈彎

我不得不認窮，從來都無想過會擁有一部Secondcar，事關我連FirstCar都未有能力擁有！但我唔會眼紅其他人擁有幾多Car，總之肯順個路，兜一兜我，又或者慷慨啲，俾我揸轉都已經好滿足。Peugeot207CC熱辣到港，上山揸咗轉，即時佩服佢彎路王之名，因為呢隻小黑獅細細粒，卻保持到攻彎利落優良血統，開埋篷發力狂飆，感覺認真爽！

記者：梁美甜　攝影：伍慶泉
模特兒：Aryi

25秒全自動開篷

當硬頂開篷開合嗰陣，硬係覺得有啲似《變形金剛》變身Feel，一按掣，個尾箱自己開或合，等個頂摺埋收入去或自動彈番出嚟，型仔都暈！而且整個過程不足25秒，若然你係開住車都照做可也，不過唔好超過10km/h囉！

4座硬頂開篷　同Grade最平

年輕一輩都鍾意開篷車，因為又型又Cool，而Peugeot新車207CC硬頂開篷版相信係一個唔錯選擇，單以四座位開篷車嚟講，可以話係同級最平一部，我都想要部Audi開篷TT，但就負擔唔到，相比Peugeot就平二十萬有多，而且設備同引擎亦不俗，反而係一個不錯之選。
多摺式開篷都出現一個問題，就係容易漏水，因為摺合位越多，越大機會喺落雨天漏水，唔開篷都無端端濕身變「水着」！新款Peugeot207CC就喺呢方面落咗唔少心機，解決過往206CC曾出現過嘅漏水情況。

■以開篷車來說，前座尚算寬敞，坐上後亦覺得氣流不大，或許我矮吧！

a.頭燈細長銳利，比渾圓嘅206CC增添幾倍霸氣！

b.車頭鬼面罩亦比上一代加大，個性更為突出。

c.開篷車車尾總是圓圓笨笨的，而新一代嘅鷹式尾燈就加番唔少英氣。

細c.c.亦無礙劈彎

Peugeot彎路王絕非浪得虛名，我都係第一次試揸Peugeot嚟掟彎，講真，真係好爽，軚盤唔算重，而且好明顯俾我知道掟彎時個感覺，全程好易掌握得到，當感到速度快咗有少少推頭感覺，只要收一收油就咩事都無，對我呢啲生手嚟講算係又爽又易揸！
不過試車當日勁熱勁曬，如果大家搽少咗防曬而開住篷揸就大件事，實變燒豬都似！做足防曬之後，開住篷掟出郊外絕對係賞心悅目嘅事，尤其係鍾意遊車河嘅人，就更加會愛上嗰種開放Feel！不過部車始終只得1,600c.c.，千祈咪苛求會有狠勁爆炸力，不過有個S模式幫你Keep住引擎高轉，發力起圍都勁番啲！

■我鍾意側鏡都有指示燈，感覺好型！

■錶板有電鍍裝飾，更添跑味！

■三幅式真皮軚盤及中控台較普通，無咩特別！

■部車最正係掟彎，反應好又咬夠地，超爽！

車仔細細　攞足5粒星

歐洲有個EuroNCAP測試啲車嘅撞擊能力，而Peugeot207CC就喺呢個測試入面，有攞足5粒星嘅優異表現，加上佢裝有歐洲通用嘅三點式Isofix兒童座椅安全機關，小朋友坐車都可以加個Seat位，提升安全指數。講安全性207CC都算有番咁上下，但講開Seat位就不得不提尾座兩個DogSeat位都係擺脫唔到「Dogseat」命運，細粒女仔或小朋友還可以，不過個椅背成90°直角咁滯，坐耐少少都幾辛苦㗎！