徐子淇大前日為李家誕下重7.8磅千億B女，新任爺爺四叔李兆基在BB出世三天，仍未親自探望，他昨日下午出現中環辦公室，並主動帶記者上會議室接受訪問。四叔指子淇首胎生女他未有失望，但已落定order說三年抱兩更好，生十個八個更好，但他未有如上次娶新抱般派萬元利是，並謂：「個個派咪唔得掂！」
徐子淇大前日（17日）在仁安醫院為李家誕下重7.8磅千億女嬰，連日來醫院及位於中環國金的恒基兆業均有大批記者等候，昨日早上國金的保安一度驅趕現場記者，其間有人送來巨型奶嘴形氣球。到下午4時多，四叔李兆基終於現身，他甫見記者群即主動說：「大家上去！上去！」記者隨即跟隨四叔上76樓寫字樓的會議室展開訪問。
補身禮物
送15萬元花膠蟲草
記者先恭喜四叔抱孫，他表現頗為淡然說：「好平常嘅事啫，生仔係人生必經階段，好閒啫，你哋都會結婚生仔㗎。」那望不望子淇三年抱兩？四叔說：「咁就梗係更好啦，最緊要係子孫昌盛嘛。」即是子孫越多越好？他說：「梗係越多越好，最好有十個八個。」問他子淇如果這胎是生仔的話，會否更加開心？四叔說：「差唔多啦，仔女一樣，最緊要有。」
問四叔可有往醫院探望子淇？他說：「佢哋（指家中其他成員及工人）日日有去探佢，有錄影啲帶畀我睇，我未得閒去，有好多公事要忙。BB鼻高高，似家誠。」BB改名沒有？他說：「隨佢父母喜歡啦，同我商量都得。」送了甚麼禮物給BB？他說：「未送，佢咁細個邊度識？但係送畀大人嘅我就講得，就係五錢冬蟲草，再溝兩両花膠，一日一劑，要燉㗎，每劑要5,000蚊，食佢一個月啦（編按：即約15萬元）。」記者指BB很旺李家，四叔說：「佢𠵱家仲懵盛盛，等佢大個啲先送，等佢大個啲想要乜就送啦。」會否送股票給BB？他說：「冇咁快，邊度講到20年後嘅事呀。」
早前四叔女兒李佩雯陪同寧波車出入醫院，是否如報道指寧波車專程來港為BB加持？四叔說：「唉！寧波車上次去醫院係因為肚痛呀。」那子淇7.17剖腹產女是否寧波車的意思？他說：「其實寧波車係同我大女熟，佢係17世活佛老師，你哋自己起佢底啦，佢念經好有地位，識大法術，不過我同佢唔熟，我個女仲幫佢喺加拿大起間廟㖭。」
孫女早產
「BB頭位置問題」
四叔再次強調BB出世日期時間非應寧波車指示，他說：「係BB頭嘅位置問題，所以早咗十日八日開刀，都係早咗少少啫。」
四叔大爆BB女由父親李家誠抱着便收聲不哭，其他人抱都會呱呱大哭，問四叔為何不盡快去醫院抱抱孫女？他說：「我要放假先得閒，有好多公事要忙。」他更指兒子媳婦和孫女會與他一起住，他說：「𠵱家間屋大裝修緊，佢哋係暫時搬出去住啫。」外間指四叔會為BB連擺三日滿月酒，他對此說：「呢啲等BB父母自己搞啦，我本人冇乜所謂，上次娶新抱係直接，今次係下一代間接啲，我有咁多仔女，如果日日擺酒，咪日日都唔得閒？呢啲嘢順其自然啦。」
上次娶新抱向員工大派萬元利是，今次抱孫會否照辦煮碗？四叔說：「佢哋（指家誠子淇）自己有分數，我咁多孫，個個都派咪唔得掂。」他透露子淇和BB會過幾日出院，永不言休的四叔表示對兒子有一番期望，他說：「希望Martin（李家誠）會青出於藍，唔做第一都唔要執輸啦。」
採訪：吳天慧 攝影：葉君海
最高蘋嬸
四叔開到口話想子淇生十個八個，換言之呢十幾年內，子淇個肚皮都好唔得閒，同全職返工冇乜分別，不如四叔直情喺恒基開個新職位畀子淇，就叫開枝散葉部總經理啦！
蘋果娛樂特派評述員蘋嬸
