保險公司競爭越嚟越激烈，想擴大市場佔有率，要花好多工夫！紐約人壽環球保險（香港）噚日話，今年第一季，按照調整保費收入（即係整付保費嘅一成，同埋定期保費嘅總和）計算，佢哋喺香港嘅市場佔有率增加咗1倍，不過，仍然只佔1%左右。
佢哋話，市場競爭激烈，全港排行第19嘅保險公司，市場佔有率同排行第10嘅比較，兩者差距只有一個百分點，呢種情形况，令華華諗起班莘莘學子，喺競爭激烈情況下，平均分差一分，排名都可以差好多好多級，搞到啲學生壓力好大！
不過，今時今日如果唔擴充，就好容易俾人淘汰，所謂不進則退！所以紐約人壽會繼續擴充人手，增加生意，𠵱家有1000多名壽險顧問，期望09年底增加到1700名。