馬主Ｈ與泰國朋友到NaiLertPark食餐，包括投資Ｓ、賓架Ｌ、地產Ａ等泰國專家。地產Ａ以前曾經在NaiLertHilton住過幾個月，對酒店有啲感情，所以主張到此吃晚飯。我哋坐在法國餐廳貴賓房，冷氣凍到震，女士Ｃ要求餐廳經理將溫度調低，經理唯唯諾諾，話即刻去做。十分鐘後，賓架Ｌ都叫凍，要求女侍應攞張披肩嚟。地產Ａ問：「有冇校低溫度呀！」女侍應答：「中央冷氣系統，冇得調校喎！」眾人為之氣結，咁樣講法，嗰位餐廳經理咪對我哋講大話？本來在法式餐廳，人客一坐低就會斟水，跟住倒酒，點知呢位女侍應只識倒紅酒，唔識斟水，投資Ｓ唔飲酒嘅，我哋舉杯之時，先至發覺投資Ｓ冇水飲。出聲嗌到，女侍應先識得行入嚟斟水。
後來大家頂唔住啲冷氣，食甜品之時，要求搬出貴賓廳，到大廳餐枱再食。經理居然夠膽話：「冇枱呀，有人訂咗！」十幾張枱冇人坐，晚上九點幾咯，仲有人客訂咗枱未嚟？呢度係曼谷，唔係巴塞隆拿喎。馬主Ｈ等一於坐在外面，經理先至死死氣擺過啲餐具，直至十點幾埋單之時，仍然冇新客到，點解經理要講大話呢？瑞士酒店係管理公司，冇理由唔訓練員工嘅啫。
呢間食到一肚氣，馬主Ｈ講與老朋友一家到曼谷半島酒店華軒中菜廳又係；八人坐在房內，女侍應企在房外，不見人影，嗌斟茶，居然次次都係部長行入嚟，女侍應罷工乎？食完乳豬（差到極）之後，未換碟，女侍應已經上翅，行到埋枱邊，先知冇地方擺低，都唔知好嬲定好笑，想唔到以曼谷半島之名，中菜與服務差成咁也。
以為素來都好好嘅曼谷君悅（四面佛隔籬）中菜會保持水準啦，食翅又係食到嚡一聲，為之冇癮。隔君悅半條街有半島商場，一行入去就有一間L'OccitaneenProvence餐廳，馳名食品係黑湯魚蛋粉（或稱TheDarkSoup），下午茶時份，十個客有八個點吃「黑湯」，味道濃郁，魚片魚蛋彈牙，冇失水準。曼谷酒店業擴充得快，可能熟手技工人數追唔上，就係差少少。好似四季咁，馬主Ｈ問一個舊電話號碼，以前六個字，現在改成點？櫃台男職員居然話自佢出世以來，曼谷電話就係九個字，乜有六個字嘅咩？好彩佢隔籬有一位年老職員，即刻畀答案。新人經驗不足，服務當然差啲嘞。