你哋都知小妹啱啱養咗隻狗，我住喺將軍澳啲村屋，可以帶佢喺附近逛吓，我諗佢已經心滿意足，完全冇諗過帶佢去旅行。但噚日小妹喺書展睇到一本叫做《帶着Goldie去旅行》嘅書，睇到好鬼感動，即刻想帶我隻狗仔去旅行。
我坐咗一程地鐵就睇晒本書，Goldie其實係一隻7歲金毛尋回犬，1歲開始跟住主人、即係作者鄺穎萱去旅行，足迹遍及本港大小海灘、離島，行山釣魚踩單車；最遠去到多倫多、波士頓。本書係用Goldie第一身去寫，字裏行間小妹感受到啲狗好有靈性，同主人一齊去旅行，真係一件好開心嘅事。
本書仲好實際教讀者點帶隻狗去旅行，好似康文署海灘禁止狗隻，大可以選擇交通方便嘅泥涌、龍鼓灘、夏萍灣，或靚到飛起嘅西貢浪茄、大浪西灣。又例如行山，建議去山頂盧吉道，啲途人好鬼nice，凌霄閣嘅PacificCoffee有露台，可以帶狗入內。搭的士上山每隻狗加收五蚊。
至於搭船去離島，最唔舒服係去南丫島，犬隻要收10蚊船費又要戴口罩，又唔准入船艙，匿喺船尾通道吸廢氣；最好係去愉景灣，唔使錢又可以入船艙嘆冷氣。本書賣69蚊，喺書展買送30蚊嘅金屬旅行水壺。講到尾要有車先方便，好彩我有個有車嘅男友。
逢周一至周四刊出