聯儲局主席伯南克在向國會作證時指出，次按問題或令美國經濟持續放緩，不過金融市場狀況普遍運作良好，然則通脹風險依然存在。綜合其言論，Ben哥認為經濟無問題，金融市場健康，息亦無得減。
有人或會問：「咁樓市呢？」伯南克刻意淡化次按危機，只說該環節之情況雖然顯著惡化，但信貸融資活動仍然活躍（意謂有問題就無人放水啦！）。呢招相當高明。
這也難怪，因為兩個月前Ben哥曾誓神劈願話次按問題不會蔓延至影響金融系統，話口未完，貝爾斯登屬下兩隻對沖基金便出事，其中一隻已全無價值，另一隻截至目前為止亦損失了91%資本，睇嚟都像日本郵船──池早丸（遲早完）。情況如此巧合，難道要堂堂聯儲局主席自摑嘴巴乎？
如果有留意前晚美國金融市場之變化，必然發覺伯南克一路講，美股一路跌，道指一度跌逾150點，聯邦債券價格則一路升（孳息下降），而美元滙價亦徐徐滑落。這似乎是極正常及極正確之走勢──樓市拖累經濟放緩，或影響企業盈利，資金從美股撤出，流向債市「灣水」（避難），美元資產不吸引，這美滙又怎抬得起頭來？汝道是否正常、正確？
可是這美股看似無力挽之際，在收市前15至20分鐘卻突然被一股「無形之手」狂掃，道指收市僅跌50點而已。嘩！短短時間內升番近100點子，你估呢隻手是何方神聖呢？（肯定唔係馬勒當拿或美斯隻手啦！）
然卻何奇之有！冠一不是早向汝等提出過「兩條腿」理論嗎？信啦啩！
若以常理衡量，無論經濟增長、企業盈利、樓市不明朗因素、非核心通脹之高，閣下都不會沾手美股吧！可是……