喺93年奪得港姐冠軍嘅莫可欣，自從同方中信拍拖後，近年轉做幕後工作，好少公開露面。可欣行事低調，有消息指佢近日喺Blog（ http://blog.sina.com.cn/mokexinblog）度，用英文寫咗一篇《廣州──我真的難以忍受的地方》文章，內容大肆批評廣州，言論偏激。
辣埋扁嫂
有網友將莫可欣段文譯做中文，佢除咗寫到「這裏的人，這裏的空氣，這裏的交通，總之這裏的一切都是那麼的讓人難以忍受」，充份顯示佢對內地嘅討厭，連台灣總統陳水扁老婆吳淑珍早前涉嫌貪污案都唔放過，揶揄佢一番。
可欣狂鬧廣州嘅文章好快就喺Blog上離奇消失，因為佢嘅批評惹起網友公憤，方中信有見及此，特別代女友寫咗封道歉信，解釋話佢哋冇唔尊重祖國、同胞，仲由一個自稱係佢助手嘅小豬，將道歉信放咗上方中信個Blog（ http://blog.sina.com.cn/alexfong317）度，事件係真係假，有待求證。
「係惡作劇」
馮仁昭噚日致電莫可欣，佢否認寫過嗰篇文章，佢仲話：「我不嬲唔寫Blog，近排都冇去過廣州。」到底佢會唔會好抗拒返內地？可欣冇咁好氣話：「我根本唔討厭內地，我諗呢次係有人搞嘅惡作劇，唔關我事。」至於方中信就喺截稿前都未回覆。
