究竟是房祖名好還是方大同好？薛凱琪（Fiona）會說兩個都很好。她形容說話速度快如AK47步槍的房祖名，愛玩DIY手作仔，送她自製相框作小禮物，又源源不絕送上心靈雞湯；至於她眼中的「道德先生」方大同則才情滿溢，擅長與眾同樂，對她無私奉獻，難怪左右逢源的Fiona跟這兩位緋聞男友一直糾纏不清，三角關係剪不斷理還亂。
薛凱琪近日忙於宣傳新歌加精選大碟《FionaFBest》，稍後則會到台北灌錄國語專輯，開拓台灣市場。事業順風順水，但感情上，Fiona卻跟兩名緋聞男友房祖名和方大同發展緩慢，除因緣份未到外，也許是他們都對她太好了。
儘管祖名緋聞多，Fiona還是信任他，她說：「我會點形容房祖名呢，『你可唔可以唔好成日AK47呀？』佢同任何人都可以打開話題做到朋友，但傳媒只係有興趣寫佢同女仔，其實佢有好多男仔friend㗎。」
與祖名互相了解
原來祖名很有耐性，又愛花心思自製手作仔，難怪有本事走進Fiona的內心世界，Fiona說：「之前佢幫我影CD嘅相，佢將一啲相曬咗，frame咗做我嘅生日禮物，幾有心思，同埋我幾信任佢，佢對我好坦白，好似佢睇完我個騷，覺得邊啲唔夠好、有乜嘢意見，會話畀我聽，其實佢吹捧你讚你，開心咪算囉，但佢唔會，佢肯講啲為朋友好嘅嘢。」
Fiona又笑說：「我哋啱啱傳緋聞時，我好唔開心，會打電話同佢講，最感動係佢仲鼓勵我、支持我、安慰我，教我唔好為新聞影響心情，佢唔會厭倦，重複用同一番說話，去同我呢個重複唔開心嘅人講，做到不斷嘅關心，我哋係幾了解對方嘅朋友，但有冇得發展？係冇諗過。」
其實Fiona與師弟方大同的關係同樣耐人尋味，她說：「佢知自己好有才華，但唔囂，好謙虛，有啲人一知自己叻就囂，囂就變咗乞人憎，但方大同冇，可能佢有宗教信仰，份人唔自私，仲會同人哋分享，佢聽到好嘅音樂，會買埋隻碟畀朋友，等大家交流，對朋友係真心好。」
「冇覺得我係公主」
Fiona跟方大同合拍的另一原因，是二人都不愛講是非，Fiona說：「有時忍唔到，邊個邊個真係好衰喎，但我哋都覺得唔應該講人是非，我哋傾電話就好好笑啦，唔開名、連性別、行業都唔講，只係講case，『你真係小心啲喎，因為有啲人會咁樣咁樣……』咁究竟係邊個呢？我哋傾偈係好虛無飄渺，永遠都唔講係乜嘢人，我覺得佢幾有道德。」
那麼Fiona究竟情歸何處？她哈哈笑說：「佢兩個冇追過我，係我好朋友咋。拍拖要雙方鍾意、雙方畀機會，當我有一日，唔知同邊個拍拖，亦唔係我揀佢，都要人哋OK至得，我冇覺得自己係公主，或者係我揀人而唔係人揀我，唔好有咁嘅錯覺。」
採訪：朱倬誼 攝影：陳俊強
場地：California
