馬主Ｈ最近到曼谷旅行，發覺近年新開業嘅酒店甚多，數都數唔晒。或者因為咁啦，酒店業嘅熟手工人扯散晒，服務水平比前幾年退步咗。
馬主Ｈ入住四面佛後嘅四季酒店，位於高鐵站旁，對出外購物十分方便，曼谷道路交通經常嚴重擠塞，幸好高鐵行走於重要購物商場區域，到沙炎廣場（SiamSquare）、素坤逸（Sukhumvit）、是隆路（Silom）一帶，快捷妥當，故此到曼谷最好都係住在高鐵經過嘅酒店，可省回不少塞車時間。
四季酒店以前叫做曼谷麗晶，初開業時叫做曼谷半島。在麗晶酒店黃金時代，曼谷麗晶不大歡迎小童入住，係一間好清靜優雅嘅商人酒店，服務一流，內裏嘅泰國餐廳SpiceMarket甚有創意。「四季」本係酒店名牌，但唔知點解，呢間曼谷四季就似乎退步咗喎，間泰國餐廳尤其退步，簡簡單單一碟炒牛肉，鹹到令人皺眉頭；一碟雞炒飯，味道不如附近泰國手藝公司NaraiPhand裏面嘅食物中心嘅攤檔，而價錢有幾倍嘅分別；幸好早餐仍然好精緻，麵包靚到冇得彈，只係時值暑假，好多細路在內，吵鬧啼哭兼而有之，令到啲商家住客為之側目。
想靜就可以去以前嗰間希爾頓。希爾頓現在搬咗去吞布里湄南河河邊，正確名稱係MillenniumHilton或稱MenamHilton，在曼谷半島酒店附近。原來嗰間呢，改名為NaiLertParkBangkok，由瑞士酒店管理，大翻新之後，充滿後現代氣息，設計十分cool，不過cool得滯變成cold，毫無人氣。泰國老友話：「以前呢間希爾頓，生意唔錯，現在叫做NaiLertPark，外國人不明其所以，生意差晒！」泰國朋友話，Lert係姓氏，Nai（乃）係先生咁解，「掠先生」係大地主，呢個區嘅公園就係叫做「乃掠公園」，唉吔，NaiLertPark嘅英文發音並非好聽，做國際遊客生意，好蝕底。馬主Ｈ與幾位朋友到酒店嘅法國餐廳食餐，五個人就可以有貴賓房，所有客人加埋唔夠十五個，真係靜過鬼。