三年又三年，究竟幾時先有本地電影推出高清影碟？影迷等咗好耐嘅答案終於有結果，《無間道》成為首套本地電影推出Blu-ray版影碟，唔少戲迷即使對劇情熟悉通透，仍然會對《無間道》BD好有興趣。不過事實上用上Blu-ray的《無間道》比起DVD版，質素係咪真係有大躍進呢？我哋就搵嚟AVConsultant嘅AlanLee評一評！
記者：許福合
攝影：梁細權
聲音有Hi-Fi感
未看畫面前，可以先合上雙眼，聽一聽《無間道》BD音質，Alan指出，「《無間道》BD用上Master靚咗，效果比起外國DVD仲要好，而且略帶有Hi-Fi聲。」若然同DVD版比較，音質明顯細緻好多，一般發燒友評語更係話好有立體感，就好似聽得出畫面一樣。DVD版甚至於戲院上映時，聲音都比較粗，BD版就無呢個情況！不過要聽出最佳效果，戲迷最好要有部支援LPCM5.1的擴音機，事關BD無咗dts，但就有不經壓縮的LPCM5.1，只要有器材，效果會比dts更好。
畫面未滿意
最估唔到係提到畫面如何時，Alan第一句就話「畫面唔好！」不過Alan之後解釋呢個原來係《無間道》拍攝上的問題，影響到高清碟質素。首先《無間道》並非採用高清拍攝，母帶並非最佳質素；再加上拍攝手法定係鏡頭問題，令到畫面好多瑕疵，常見光位同暗位，DVD版可能都唔多覺眼，但用上BD高解像度，就一清二楚！好似曾志偉一開場件白衫竟然光到無嘢睇，另外唔少暗位好似皮褸、頭髮都係唔見晒。「《無間道》1-3集都有嚴重Outfocus問題，DVD版鬆鬆矇矇可能唔多覺眼，不過今次BD就變得好明顯喇！」
BDVSDVD
以下畫面使用SONYBDP-S1E播放《無間道》BD，再用DVD版作比較。相比DVD版，BD的質感明顯比較Sharp啲（Outfocus畫面另計）。
記者意見
就筆者試碟時見到，以往唔多覺眼之處，BD版都現晒形，最明顯係唔少畫面都變得唔夠Sharp。反而Alan提到光位同暗位問題，如果唔係對住DVD版比較，一般人都可能留意唔到。不過整體上《無間道》BD比較DVD版，無論係聲畫都有提升，而且作為本地電影BD打頭陣，亦絕對可以收貨。筆者亦打聽過有見BD碟機的普及情況，暫時推出的BD版都會以主流電影或演唱會為主，業內人士現時都在觀望階段，睇埋今次《無間道》BD巿場反應再算。
BD碟機推介
講BD碟機，可能即時都會諗起PS3，價錢比起專門的BD碟機平一半以上，不過如果想多啲嘢玩及設定，就要出動專門BD碟機。現時比較多人有興趣主要係SONY同Panasonic所推出的BD機：SONYBDP-S1E效果比較穩定，畫面接近電視感，硬度及清晰度高；另一部PanasonicDMP-BD10喺美國相當受歡迎，畫面有電影感，相對設定調校都比較詳細。至於新近有Blu-ray同HDDVD兩用機，主要以LG及三星為主，不過一般發燒友仍覺得日本機質素較佳，加上價錢較貴，多數抱睇定啲心態。
查詢：
（a）DVDPro（23326326）
（b）AVConsultant（25812928）
（c）I-Gamer（27253338）