泰利終於扭到加人工！呢個要養傷一段時間嘅英格蘭後衞會喺美國之旅後，同車路士簽一份周薪131,000鎊（約210萬港元）嘅5年合約，成為英超聯人工最高嘅球員，睇嚟呢位「英超賭神」仲可以去賭場慢慢玩，實行學007「智破皇家賭場」。
現年26歲嘅泰利，同車仔得番兩年合約，但喺人工上一直拗唔掂數，所以遲遲未續約。但我求大俠收到風，話車仔終於屈服，願意將泰利嘅周薪由原來嘅68,000鎊，大幅加至131,000鎊，份約仲開到5年咁長。
咁又係，烏克蘭前鋒舒夫真高同德國中場波歷克上季踢到隱形，前者喺英超仲入得嗰4球，但個個禮拜居然有121,000鎊袋袋平安，而泰利喺車仔後防一夫當關，車仔冇咗佢成條防線散晒，所以佢收131,000鎊周薪，真係物有所值。
友賽斷腳趾難鬥銀河
唔知係咪錢聚腳嘅關係，泰利喺禮拜二贏南韓水原藍翼場友賽，整斷腳趾，肯定踢唔到禮拜六對美職洛杉磯銀河場友賽，但就應該趕得切喺下月11日嘅英超揭幕日復出。話時話，泰利有「英超賭神」嘅稱號，𠵱家要養傷，人工又加咗一大截，唔賭錢仲有乜嘢做。
碧咸嘆美職水準低
講開受傷，新加盟銀河嘅碧咸因為足踝受傷，好大機會對唔到車仔，如果係真肯定令唔少球迷失望。而有口痕友話碧咸佢喺禮拜二，睇到銀河喺友賽慘吞墨西哥嘅堤格雷斯3蛋，即時心都寒埋，事關佢估唔到班新隊友得業餘水準，覺得自己上咗賊船。
之但係，美職聯水準低就係人都知，碧咸佢喺球圈打滾咁多年，應該略知一二，更何況佢嘅終極目標係進軍荷李活，家陣啲隊友水準低，更加突顯到佢係星中之星。