有人說：「女人有兩個胃，一個專用嚟裝甜品！」講啫，食完一件芝士Cake，咪又係長肉！加上炎炎夏日，對住甜品又忍唔到口，更是一啖一脂「慌」。好在今時今日樣樣美食都有低脂，甜品亦唔例外，雪糕、蛋糕、芭菲樣樣齊，多食都唔怕肥，真係身心都開朗「輕」鬆到有如飄飛於萬里晴空呢！
記者：趙珮倩、馮冠芝
攝影：陳偉強、譚盈傑
Model：Mia
火槍燒朱古力，正！
嘩！Pizza+雪糕？簡直係世上致肥的完美組合呀！但今次Pappagallo推出的雪糕Pizza，採用意大利gelato雪糕，脂肪含量只有6%，食多幾件都唔使驚！可選擇DIY套裝，附上鋪了低脂雪糕的餅底，新鮮生果另上，大家可以隨意鋪上心水生果。
小記則建議大家買製成品，因為店員會用火槍燒一下鋪在pizza面的白朱古力碎，搞到佢溶溶哋好似芝士咁！而且朱古力燒到脆卜卜，暖暖哋配上雪糕，冰火感覺甚為刺激，再加上新鮮荔枝、士多啤梨等清甜的生果，整個pizza口感豐富，好fresh，正！
提子冧酒雪糕
杯裝$20/筒裝$26
先是飄來陣陣冧酒香，之後酒味充滿口腔，咁勁酒香味，原來當中的提子用酒浸了半年之久！但咬一下提子粒，居然還保留淡淡提子清甜，然後是gelato本身的奶香味。小小雪糕三重味覺享受，卻不必擔心3層肉的後患，瞬間歡愉也可以是永恒的回味！
仲夏夜之夢（香橙雪果+士多啤梨肉）
杯裝$20/筒裝$26
味道咁熟口面？好似雪糕車賣的那種橙冰，但又冇橙冰咁甜！原因在於新鮮士多啤梨粒酸酸哋，中和之下，甜中帶酸，非常醒胃！雪果落到喉嚨，才慢慢傳來一陣橘香，雪果本身係zerofat，吃時開心倍增！
荔枝火龍果雪果口味
杯裝$20/筒裝$26
乍看，一塊火龍果肉放在杯上，吃時也以為只是火龍果；當然，因為雪果用鮮火龍果肉製，保留清甜鮮香味！「那何不亁脆吃火龍果呢？」錯了，多嚐幾口，荔枝味就慢慢滲出來，只是火龍果的話，又怎會有如此有趣的味道呢？
Pappagallo（34228645）
地址：觀塘apmUC45號舖
營業時間：12:00n.n-11:00p.m
座位：2個（外賣為主）
有機健康之選
蔬菜生果有機就聽得多，甜品都有機？正是！SuzukiCafe大部份甜品均以有機材料製造，豆腐、黑糖、紅豆等，加上低脂低糖配方，健康到想食肥都難！
豆腐杏仁芝士餅$22
以低熱量的有機豆腐取代部份芝士份量，食落一點不覺heavy，芝士、杏仁、豆香三種味道和諧融合，口感清新嫩滑。
豆腐黑糖豆乳沙冰$30
以有機黑糖、豆腐、豆漿及牛奶打至沙冰幼滑，仲咬到豆腐碎粒，味道有點像腐竹糖水，飲完之後cool到入心入肺，消暑極品。
紅桑莓呍呢拿奶凍$24
以低脂忌廉加新鮮呍呢拿打成內層奶凍，外面包上鮮紅桑苺慕絲，酸酸咪咪唔怕膩。
SuzukiCaf囗（28932666）
地址：銅鑼灣禮頓道29號華懋禮頓廣場地下2號舖
營業時間：7:00a.m-10:00p.m
座位：50個
乳酪新花臣
係人都知乳酪低脂又健康，但多數是買杯裝的齋食吧！有沒有試過將之做成蛋糕，或者加入咖啡、果汁呢？BestBerry老闆KangTaeWook是正宗韓國人，他將這類乳酪新奇食法帶來了香港，看來韓國女子又靚又苗條，是有秘訣的。
低脂鮮果乳酪$25
（加$7選配5款生果）
又話新花款？只是普通乳酪加生果！但有時越普通越試出功架！乳酪滑得嚟有濃濃奶香，唔覺得滯之餘，乳酪獨有的酸味化解一切！再加上新鮮生果為乳酪添上色彩！例如新鮮柑清甜得嚟有少少青澀，好鬼fresh！
原味乳酪蛋糕$22
（套餐附加生果）（前）
乳酪軟腍腍，點整成蛋糕？只要將乳酪與少量忌廉打至較硬身，就能配合海綿蛋糕。蛋糕本身甜甜哋，由乳酪的微酸中和，一切都啱啱好！
乳酪Latte
熱$25/冷$27（後）
Latte好飲，但那層忌廉難免令女士三思。但這款Latte，面層的「白雪天使」是七成乳酪三成忌廉，既保留忌廉的滑溜感又不致肥，姊妹們，放心飲啦！
Smoothie：
草莓草莓（BerryBerry）$29（士多啤梨+藍莓）
綠之皇后（GreenQueen）$29（奇異果+菠蘿）
Smoothie是混合了低脂奶、鮮果和乳酪的飲料，酸酸甜甜口感滑，飲之餘仲要咬，絕對要試！
BestBerry（24853330）
地址：葵芳新都會廣場1樓217-218號舖
營業時間：8:00a.m-12:00p.m
座位：約20個
蛋糕芝士不肥之謎
低脂=冇咁好味？錯！有十幾年酒店餅房經驗的Ben師傅自有妙法：「用低脂忌廉、低脂牛奶做的蛋糕，味道一定冇原味咁濃，所以要加多啲其他元素，如生果、乳酪，豐富番口感，食落唔會覺得係低脂，一樣咁好食。」原來「低脂=更好味+更健康」才對呢！
熱情果芭菲$18
未食入口，勁清香的熱情果味已飄至，刺激嗅覺以引起食慾。吃一口，感覺冰凍軟滑似雪糕，酸酸甜甜，十分醒胃。
低脂芒果慕絲蛋糕$18
芒果慕絲味濃唔太甜，兩層薄薄的蛋糕底亦做得鬆化出色，配埋半個新鮮芒果一起食，少了脂肪，多了果香。
Marco's（23752352）
地址：佐敦吳松街169-189號聖地牙哥酒店地下
營業時間：7:00a.m-2:00a.m
座位：60個
