中、日混血兒和田裕美早前憑主持旅遊節目《雪映移城》符碌彈出，其經理人公司隨即為她推出處女碟。不過一直被網民狠批造作的她再捱轟，指其齊蔭啡髮look和形象，均抄襲自可愛教主楊丞琳，自言聽慣冷言冷語的裕美一於扮聾，這19歲的女孩倒是EQ高。
和田裕美為無綫主持旅遊節目《雪映移城》後一度人氣上升，她介紹日本東北區的雪景，畫面靚絕，由她哼唱的主題音樂，更曾成為熱門手機下載鈴聲，不過評語有正反兩面，大批網民炮轟她作狀扮可愛，極為難頂，但老套的一句：有人講總好過冇人講，故其經理人公司近日食住上為她推出處女大碟。
「同學仔成日講我」
早於《雪》節目播映時，已有網友將裕美和可愛教主楊丞琳比較，今次裕美出碟，有人讚她唱功不俗，有人彈她駁髮兼梳了一個齊蔭啡長髮的新look，整個形象賣相均抄襲楊丞琳，但評論聲音再多，這位19歲的女孩依然眼不見、耳不聽，除了個人blog外，都不看各大討論區留言。
裕美說：「我冇乜感覺，以前都聽慣冷言冷語，啲同學仔成日講我㗎啦，人夾人嘅，唔可以迫全部人鍾意自己，我唔覺自己扮嘢同扮可愛咪得囉，我都唔識扮嘢嘅。我由4、5歲開始已經係梳遮面齊蔭髮型，亦唔可以因為楊丞琳整咗呢個髮型，就全世界都唔可以整，可能係style令人有啲聯想啫，但佢女仔好多。」
對於形象打扮被指與楊丞琳相似，裕美則說：「係形象設計幫我搞，但呢啲衫我都幾鍾意。」提到楊丞琳也屢被批評裝可愛，裕美表示至今未曾跟對方碰過面，她說：「總有人鍾意、有人唔鍾意，公眾人物預咗俾人講，我有聽過楊丞琳唱歌，佢唱得算幾好，都可愛嘅。」
銅鑼灣有巨型海報
其實裕美的經理人公司甚為重視其新碟，近日特別在銅鑼灣兩棟大廈外牆懸掛兩張巨型海報，難怪日前裕美專程走到附近拍照留念，興奮得紮紮跳，比執到金還要開心。
採訪：朱倬誼 攝影：陳志嵐
