今個暑假，最大嘅節目就係同成家人去澳門玩，仲係計劃去即將開幕嘅豪華酒店威尼斯人度假村酒店，諗起都開心死，永安旅遊喺網上仲有得book㖭，又幾方便噃。前日小妹咪到永安網頁book囉，點知谷餐死。
小妹首先click入永安網頁上酒店嘅icon，選定地區、酒店價錢、日子咁；睇吓有冇相關酒店，我選咗8月12至8月13日入住，威尼斯人度假村酒店有房，每晚1,430元。我book咗五間房，喺網上填晒姓名、地址、電話，然後仲要填埋信用卡畀錢。我心血來潮，根據網頁熱線打電話去永安問吓訂房情況，職員話用信用卡網上付費要2,000蚊以上先得。我話訂五間房成七千幾蚊。
點知佢搞咗一陣，竟然話𠵱家唔可以網上訂酒店。唔係啩，咁大間旅行社，仲係上巿公司，我填晒網上嘅form，搞咗半粒鐘，最後話唔可以網上訂酒店，最後咪迫我幫趁第二間。小妹噚日打去向永安嘅公關反映，但係佢未回覆。
逢周一至周四刊出