星期日到馬會飲茶，背後座位之人竟然是退休高官M，連忙同佢夫妻兩人握手問好。高官M係英國人，回歸後因國籍問題，冇得做局長，但做過署長，去日內瓦做經貿代表，都相當唔錯。高官M讀書時在倫敦亞非學院讀阿拉伯研究，當年係比較冷門啲，𠵱家就係西方極度重視嘅科目，不過高官M畢業後考到嚟香港做政務官，一來三十幾年，佢話已經唔多記得阿拉伯語，但廣東話就講得非常流利。
自日內瓦回來，放幾個月假之後，高官M會否重出江湖，到私人機構打工？左丁山話：「不如你去應徵做領匯總裁啦，你做過房屋署，管番以前房署轄下商場，好『依時』啫，況且領匯單一大股東TCI係英國幫，由你去應付，容易話為啲。」高官M連忙耍手擰頭，猛話：「過完冷河先至再諗，大概都會諗吓再打工嘅，日本婦女有句口頭禪：husbandandgarbagemustbeoutofthehouseby7:00a.m.（丈夫與垃圾須於上午七時前不在屋內），退休男人留在家裏，會阻住老婆㗎！」
講笑啫，以高官M咁嘅人才，過完冷河一定會有獵頭族打電話畀佢；時值暑假，不如去遊埠先，佢與太太會周圍去，尾站係日本，目的係睇晒所有主要博物館，高官M喜歡收藏玉器，曾在中文大學文物館展出自己收藏品，甚獲好評。
傾傾吓，大經紀H行入嚟，佢與高官M係老朋友，竟然在馬會相遇，大家都有啲愕然，握手零舍大力，經紀H問攞電話、電郵；高官M笑曰：「黑莓已經交番畀政府，太太話唔想再聽到BeeBee聲，呢幾個月連手機都唔用。」不如用手寫啦，於是我哋用最原始嘅方法，將電話、電郵寫在餐巾上。
見到經紀H，唔記得問股票，有啲可惜，不過大編輯代何車送來一份「上車落車」之2007Q2剪報，睇番何車嘅推介，有升有跌，最威係於四月二十五日推薦首長國際（697），升咗近1.5倍，最失色係推薦浪潮（8141），跌咗三成，何車今年趁市旺，當然賺到笑，睇怕又可以買多一間陽明山莊大單位。佢每日寫一篇稿，寫足四小時以上，努力與稿酬完全不成比例，只係鍾意將研究心水公諸同好而已！