喺特區主板上市嘅公司，每年都要公佈兩次業績。相信作為《金手指》fan屎嘅你都知，一次係全年業績，一次係半年業績。喺特區裏面，有一個財經口水佬，對花旗國樓市極度悲觀，而同時因滙豐（005）做咗好多花旗國樓宇按揭，所以都非常睇淡滙豐。相信作為《金手指》fan屎嘅你都知，呢個口水佬就係孫柏文。
不過今日就當爆冷，因為我相信滙豐喺7月30日，公佈嘅半年業績，應該會冇事。大家可能會話：「孫柏文轉軚！」冇轉軚！等我慢慢解釋。雖然滙豐確實擁有好多花旗國次按債券，不過我相信佢哋揸嘅係啲有「攞錢」優先權嘅「優質」AAA、AA級嘅次按債券。
分析員睇倒後鏡揸車
如果大家記得，今年2月大家第一次聽到「次按債券」呢樣嘢，係因為次按債券當中，冇「攞錢」優先權嘅「劣質」BBB級債券爆煲。當時，AAA、AA級嘅次按債券係冇事。
大家要記得，滙豐計半年業績嘅截數日，係6月30日。同日，滙豐亦正式進入公佈業績前一個月嘅silentperiod（沉默期），唔准講嘢。咁點解我會話業績冇事？左邊為大家提供反映花旗國AAA同AA級次按債券價格嘅走勢圖，大家就會見到直至6月30日，AAA同AA級次按債券冇乜點跌。所以反映滙豐直至6月30日狀況嘅半年業績，應該會冇事。
今日見到有投資銀行，調高滙豐半年盈利預測同目標價，孫柏文絕對可以理解。業績係倒後鏡，呢個分析員靠睇倒後鏡揸車，果然藝高人膽大，小弟敬佩、敬佩！
金手指網誌： http://phatdat.blogspot.com