嗌咗十世嘅高清數碼廣播繼續有聲冇影，不過就快有得睇。TVB噚日喺豐澤電器全港50間門市擺檔，勁播未公映嘅重頭劇《珠光寶氣》，及應屆港姐參選宣傳片段，畀大家感受有幾highdensity。
揼幾多錢先有高清節目出爐？TVB嘅廣播業務總經理鄭善強話，初期製作成本只係比平常標青節目使多20至30%，有信心一年後控制喺10%內，關鍵在於後期製作工序。佢又話，高清劇賣埠價錢好啲，拉勻條數，公司業績唔會受到拖累。
講到高清電視啓播日期，鄭善強估最大可能係今年底。華華最有興趣想知，所謂靚爆鏡嘅型男索女，喺咁「高清」下，要幾多斤粉先遮到暗瘡痘痘呢？TVB高清大使Suki徐淑敏嗲爆咁話，都幾驚會現笑紋。另一大使楊思琦就賣口乖話，壓力會化為推動力，每次都執到正先見觀眾。