新上市嘅新世界百貨（825），除咗首日掛牌頭威頭勢，股價急升過18%，之後不斷跌，噚日穿埋招股價。早排新世界傳動網俾人淋紅油，新世界中環總部又俾車撞，彤叔話：「我冇得罪人。」不過，如果幫新世界百貨上市班賓架唔做啲嘢，就可能令佢老人家得罪成班散戶。
Motherwell好勞氣話：「佢之前冇得罪人，但家吓成街都係仇家！」Smsa亦埋怨：「鬼叫鄭生俾人淋紅油咩！拖累股價。」Francowa亦話：「隻股個勢咁弱，早走早着，不如改埋名叫新世界深潛百貨！」Lightman話：「估唔到呢隻嘢咁快潛水，香港富豪都係信唔過。」
搞成咁要怪保薦人
海賊王Opiece好慘咁話：「𠵱家走要輸幾十個，唔走又唔知幾時先升，當初諗住復星（656）好難中，改抽825，點知復星一人一手！新世界百貨都算好嘢，第一隻內需百貨股居然搞成咁！」媚媚1981認為：「搞成咁要怪保薦人，都唔知德意志同滙豐點做嘢！撐唔起個股價。」
Tim10281028搞笑話：「新世界百貨跌穿招股價，話唔定對彤叔嚟講係好消息，可以高價出售，跟住低價私有化返嚟。」若然彤叔真係咁做，大家經過新世界旗下物業時，就要小心揸住罐漆油嘅人。
http://www18.discuss.com.hk/viewthread.php?tid=4759255&extra=&page=3
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]