TOM（2383）旗下嘅CETV（華娛衛視）應該就快有響朵之作！噚日佢哋宣佈，拍住專創製意念新穎電視遊戲節目嘅瑞典媒體公司BringItOn，喺大陸搞中文版《超級購物王》。
下個禮拜二雙方會喺北京開記招，華華睇過個介紹，個遊戲似乎會好似《超級女聲》咁有noice！
玩法係喺全國挑選32個參賽者，每人畀一張creditcard，要佢哋喺12個大城市鬥快喺限定時間內完成購物任務，而終極要爭嘅獎品，冠軍就可以落香港一日內豪使100萬瘋狂購物，實現終極購物夢想！一日喪fing100萬唔使自己找數，贏咗嗰位真係要感恩！
主辦單位話，任何成年中國人都可以報名，只要登入Sina或者CETV網站，或者喺北京、上海同廣州啲7仔攞報名表。
但咪開心住，報名表格要填埋身高、體重、三圍同特徵，例如男性身高有冇180cm或以上，女性要答係咪CCup或以上。話晒要出鏡，梗揀啲樣靚身材正去玩啦，唔係搵鬼睇咩！