恒指噚日收23057點，升咗103點，暫時都仲算企穩二萬三。今晚二奶台首播秋官擔正嘅《榮歸》，究竟會唔會再引爆「丁蟹效應」，抑或香港真係行緊大運，好似賭王喺年頭話齋，一路飆到年尾嘅25000點呢？
華華冇水晶球喺手，的確好難做預言家。之不過，搞注塑機近50年嘅老牌工業股震雄（057）主席蔣震，噚日公佈全年業績後，就親口「啤」咗個大願景出嚟。蔣老話，港股現時水位唔算高，但嚟緊會下調2500點，之後就升爆三萬點樓上。薑係老嘅辣，早排一堆外資大行嘅恒指預測，最強嘅麥格理，都只係貼24500點，輸畀蔣老幾條街。
雄心萬丈嘅蔣老，突然又縮沙話，自己只係工業家，唔係股評家，對恒指嘅預測唔負責任，要信就信《信報》專欄作家曹仁超。蔣老仲加多兩錢肉緊講，自己已經八十幾歲，冇乜需要炒股票，亦唔想發達，𠵱家只係揸住震雄約10%權益，千叮萬囑唔好信佢支笛喎。
嘆傳媒監察力不足
唔講市，講吓香港政經環境。舊年7月特首煲呔曾，計劃強政勵治全面落實銷售稅。有大紫荊勳章、一向熱心公益嘅蔣老仗義批評，銷售稅係劫貧濟富嘅稅項，對低收入人士肯定唔好，之後銷售稅嘅討論，就被迫取消咗。
華華噚日重提呢段偉績，蔣老除咗堅持己見之餘，亦慨嘆傳媒監察力量唔夠，應該講多啲銷售稅點影響民生、人均收入點解下降，窮人點過生活嘅例子，雖然「恨鐵不成鋼」，但講到自己落手辦報，蔣老就耍手擰頭，猛話肯定蝕本。
[email protected]