對賭！眼看曼聯豪擲數千萬鎊收購阿根廷國腳泰維斯，玩得咁過癮，據英國《太陽報》報道阿仙奴亦唔輸蝕，突然掟出1,500萬鎊（約2.4億港元）「籌碼」，力邀泰維斯嘅國家隊隊友柏拉斯奧入「廠」；而因泰維斯嘅合約𠵱家搞到亂七八糟，故兵工廠隨時遲嚟先上岸！
由於泰維斯嘅合約糾紛仍未搞掂，導致紅魔領隊費格遜得個「急」字，反而死對頭雲格就可能快一步，簽到泰維斯個阿根廷隊友柏拉斯奧；英國行家爆出，年僅25歲嘅小保加前鋒柏拉斯奧，快將以1,500萬鎊過檔阿仙奴當「兵」。
或繼承亨利14號球衣
美洲國家盃決賽輸波後，柏拉斯奧就會即時離隊，喺周二飛抵倫敦進行體測；此名對14號情有獨鍾嘅小子，喺小保加同阿根廷國家隊都係着呢個冧巴，故此他日後自然理所當然地穿起「亨利大帝」嘅阿仙奴14號球衣，揹起「亨利接班人」呢個牌匾。小保加會長麥斯利亦證實了是次交易幾近完成，但佢補充一句：「轉會費仲可以高啲，因為佢係阿根廷國內最佳前鋒！」
梗係可以高啲啦！原來柏拉斯奧唔止同泰維斯係同胞，兩位仁兄嘅合約都係內含複雜隱情。擁有柏拉斯奧嘅最大股東，並唔係小保加，而係佢兩間前東家TA颶風隊同班菲特，反而小保加只係有權決定賣唔賣走佢而已。不過，阿仙奴就眉精眼企，一於唔理三七二十一，筆轉會費就包括埋擺平嗰兩間球會，費事再生枝節喎！