都話商場上冇永遠嘅敵人，舊年年中，當陳南祿仲係國泰CEO，而許漢忠仍係港龍CEO時，因為國泰收購港龍，許漢忠冇幾耐就劈炮，搞到有傳聞話呢兩個龍頭不和。傳歸傳，唔理真假，家吓各有各歸宿：陳氏升咗上太古權力核心做太古中國嘅主席；許氏被委任做機場管理局行政總裁，既然各不相干，再見亦是朋友，而噚日，許漢忠仲專程到陳南祿嘅新書發佈會支持佢。
話說陳南祿公餘除咗鍾意夾Band外，亦鍾意寫嘢，加上佢乘搭飛機多過一般人坐巴士，見聞唔少，已經出咗四本文集寫遊歷，噚日出第五本《獅城畫意》，搞個新書發佈會，雖然冇寶Baby嚟支持，但一啲都唔差過煲呔曾嘅簽名會，馬仔馬時亨局長同蔡瀾都有捧場，許漢忠亦「冰釋前嫌」嚟到賀。
雖然家人冇現身，但陳南祿嘅外父，即美心集團大老細伍沾德亦好有心，訂咗個大蛋糕，上面有埋新書造型，睇嚟陳南祿人緣都幾好。
[email protected]