整容女星吳文忻的性感純影集將於今日胸降書展，今次她在處女寫真中激到震，全裸凸點上陣，僅披薄紗遮掩33C、24、33的葫蘆身形，噴血指數全爆燈，但其另一赤裸上身、交叉腳的坐地誘人甫士，則與荷李活女星狄美摩亞（DemiMoore）的《脫衣舞孃》（Striptease）電影海報似到足，實在巧合得離奇。
今年書展不乏藝人加入出書戰圈，繼2R成員黃婉伶（Race）在新書《伶．開始》中大賣水着照後，整容女星吳文忻也在今日推出純美影集《significanceofFACE》，勁騷噴血身形，實行與Race在今日起舉行的書展進行埋身肉搏。
早前吳文忻與攝影師WilsonC.和形象設計師王穎組成三人兵團，先後在香港、泰國及澳門取景拍攝，除有例牌靚人靚景外，重頭性感相也極有瞄頭，當中包括她全裸出擊，以一塊薄如蟬翼的紗布遮掩嬌軀，凸點兼現全裸大側身；另一造型則赤裸上身，以長髮遮掩胸前兩點，交叉腳坐地，但此撩人甫士卻與荷李活女星狄美摩亞主演的96年電影《脫衣舞孃》的海報，效果如出一轍。
裸足個幾月
純影集中，尚有吳文忻穿三點式泳衣，攬猛男瞓沙的親熱照，又有化身日本歌姬、濕身透視及狂野造型等，而她更拍攝一幀戴港姐后冠但鼻樑黐膠布的相片，表示她奪98年港姐季軍和接受隆鼻整形手術，均屬其人生轉捩點。
吳文忻昨日接受電話訪問，提到今次大突破時說：「我第一次喺攝影師面前赤裸，前後影咗個幾月，已經冇乜尷尬，都有黐膠布同黐乳貼嘅，影嗰張nude（全裸）嘅相時，我有着T-back，但剪爛咗條邊，係用膠紙黐住嗰『點』，凸點反而冇乜嘢，以前我喺美國住時，個個鬼婆都係咁㗎啦，我覺得凸點好靚，但平日喺香港就唔會啦。」
戒肉保線條
吳文忻為以最佳體態示人，拍前戒口及做運動，她說：「我守齋一個月，唔食澱粉質，食物只係舔兩啖，同埋做瑜伽、做身體護理，胸部都有做treatment，有提升線條。」而她將在本周六舉行簽名會，其純影集收入扣除成本開支外，將撥捐慈善基金。
採訪：林妃
