台灣人氣偶像吳尊同張韶涵近日喺台灣趕拍偶像劇《公主小妹》，日前拍咗場幾分鐘嘅雨中共舞戲份，睇嚟好似好浪漫，不過鏡頭背後，佢哋俾花灑淋到全身濕晒，頭髮同化妝又亂又溶，非常狼狽。
勤力刨劇本
為咗呢場雨中共舞戲，吳尊同張韶涵事前苦練咗5、6粒鐘，吳尊雖然係運動健將，身手靈活，但就唔擅長跳社交舞，所以跳起華爾茲嚟，手腳好僵硬，仲俾大家笑佢似機械人㖭。由於吳尊嘅爺爺由金門移民咗去汶萊，連帶吳尊嘅普通話都有好重福建口音，拍劇時，吳尊成日俾張韶涵笑，導演仲幫佢改咗個花名叫「金門腔」。
吳尊知自己咬字唔清，一於將勤補拙，唔使埋位就好勤力咁刨劇本，佢話：「每天拍戲進度是過去的兩倍以上，我希望能全部現場收音，但有些發音還是不夠好的，要事後配音。」
