陳法拉上星期五同陸詩韻、呂慧儀以及陳茵媺等到番禺長隆水上樂園拍攝特輯《夏日5A歡樂遊》，有雜誌直擊全程，話陳法拉當日喺碼頭集合時遲到，拍落水片段又扭計，次次等到最後一刻先剝衫落水，搞到助導扯火罷拍，甚至將通告擲落地。
扭扭擰擰
馮仁昭打聽下，原來陳法拉當日當正自己係阿姐咁態度囂張，首先佢去到碼頭時發現唔記得帶護照，於是趕返屋企攞，跟住去到現場又扭扭擰擰唔肯着泳衣，要工作人員又哄又𠱁先肯拍幾個泳衣鏡頭。由於陳法拉喺《溏心風暴》同《師奶兵團》都肯着三點式，偏偏今次拍水上活動節目唔肯着，又難怪導演助導㷫到爆炸，一度同佢嘈起上嚟。
陳法拉噚日喺電話度話：「我出發前都知道要着泳衣，拍得好順利，我冇扭計。」雖然陸詩韻噚日出席尖沙嘴活動時，話唔覺陳法拉扭計，但馮仁昭知道導演已經同上級投訴佢工作態度有問題。另外，有指港姐喺水上樂園拍特輯時爭住走光，呂慧儀露點搶鏡，噚日陳茵媺喺電視城力撐話：「我唔信佢會走光，冇可能發生，我睇到幅相都好驚喜。」驚喜？係咪想講驚訝呀？
