香港零售咁好景，大陸熱錢缺堤咁湧落嚟，但勢估唔到舊年業績唔係咁差嘅廸生創建（113）主席潘廸生（圖）居然要減人工。華華收到廸生年報，發現潘生嘅薪金、津貼同福利，雖然加咗3.19%至511.5萬，但酌情花紅就減8.76%，只有約500萬！
連同冇變嘅董事袍金同埋退休計劃供款，潘生全年總薪酬約1013.7萬銀，減咗32.2萬，整體減幅成3.08%！華華翻查廸生業績，發現廸生全年純利倒退約10%，唔知係咪因為咁，所以潘生就罰自己減人工！
其實大家都唔使同潘生擔心，按公司全年每股派息41.3仙計，佢攞成48%權益，總共會收到約6170.52萬銀股息，收少32.2萬對潘生嚟講，真係好似跌咗個蚊銀咁小兒科啫！