未上畫已被譽為07必睇電影，《變形金剛》誰可匹敵。24號香港上畫，全城熱話，連帶舊時玩具都炒到飛起。就算唔打算買飛入場睇，都要知佢講乜。數全香港，最有資格同你補堂變形歷史，非香港變形金剛聯盟（HKTF）會長Patrick莫屬。廢話少講，即刻帶你去會長個變形基地，Show你睇萬元一件嘅超級珍藏！
記者︰陸俊雄、陳國輝
攝影︰譚盈傑
貨倉放玩具 老婆喪鬧
講《變形金剛》，邊個熟得過HKTF會長Patrick。佢將珍藏放滿全公司，「有人見工時問我係咪賣玩具。」實情係辦公室前後兩個細倉內，有3/4都係玩具。「02年正式開始搜購老變玩具，當時未瘋狂，近年先大手買入。老婆初時喪鬧，但最後接受咗。」幾乎所有老變宣傳活動，都有人問HKTF借玩具做展覽︰「HKTF01年成立，原先係班發燒友在newsgroup打牙骱，幾次聚會後，大家想集埋一齊買玩具，決定組會。」貴為會長，想考佢老變歷史唔難，隨口問電影問題，反應快到痹︰「卡通電影版86年第一次上，講柯柏文死。2000年因老變20周年，套片再上映。」話題一開收唔到口，佢順勢解釋埋電視版︰「最初電視分4個Season，統稱G1。頭兩季柯柏文仲在生，到電影版上畫先講佢死。但孩之寶估唔到反應咁大，好多家長因小朋友唔開心，要求老柯復活，於是第三季翻生！」
$8,000入手
除咗歷史，邊件玩具當炒亦難唔倒佢，佢反問小記$10,000個變形金剛見過未︰「我用$8,000蚊買咗第三代博派首領福特個細佬格蘭，之後老闆話有人用$10,000買埋最後嗰隻。」Patrick上年喺大陸擺展覽時，已有同胞想佢出讓。佢當然唔賣，因為呢個巨無霸88年只出過日版，美國因玩具安全條例冇出︰「佢係第二版，第一版福特仲值錢，我有隻二手網上炒到$2,400，全新值$12,000。」而近年玩具當中日本MP系列最當炒︰「日版MP值錢，因外形同可變性都係老變玩具中最好，MP-04（即老柯連貨櫃）最好賣，至少$1,200。」
新版玩具炒唔起
電影下周殺到，Patrick好坦白︰「新版玩具唔值錢。」佢解釋同造型冇關︰「每個新系列都有好玩嘅地方，唔值錢係因玩具配合電影全球發行，產量太多。」佢舉日版MP-01柯柏文為例，初出產量少已經炒至$800，之後美版有出，但基於安全條例兩膀煙囪冇咗，令日版更值錢。後來Takara接到大單，先肯再出一次，價錢一度回落到$400，但太多人爭，好快返上$1,200。」Patrick係玩家唔係炒家，件玩具值唔值錢佢冇所謂，如未出的14"大黃蜂，佢就等得最心急。
變形金剛速讀班
唔理你有冇睇過卡通，電影版《變形金剛》係話題作非睇不可。女士入場前最好先補習，男士記憶重組，先同朋友吹到兩嘴！
博狂兩派
狂派專搞破壞，其實兩派名字譯自G1卡通時期Autobots和Decepticon兩派尾音。「bots」為「博」，「con」為「狂」。
柯柏文（OptimusPrime）
博派首領，卡通內係架紅色貨櫃車頭，86年大電影內被麥加登打敗戰死。
麥加登（Megatron）
狂派首領，卡通內變成納粹德軍P.38曲尺，但電影版係戰機，撞入地球冰湖被封印，一班手下趕到地球搵佢。
大黃蜂（Bumblebee）
新電影前半部主角，係黃色雪佛蘭（Chevrolet）。卡通內佢只係配角，係架福士車。
星星叫（Starscream）
狂派第二把交椅，成日想取代老麥。卡通內係F-15戰機。有人誤稱佢做「猩猩叫」，睇番英文「Starscream」就知「星星」至啱。
能源方塊（AllsparkCube）
博狂兩派故鄉星球能源快耗盡，於是四出尋找能源。係麥加登命手下音波，做件器皿將彩色石油裝起，變成所謂能源方塊。
機體（Matrix）
指柯柏文心臟，歷代博派首領信物。86年電影內，老柯死前將機體傳畀馬格斯。新電影中，老柯想用佢自爆，炸死麥加登。
電影版3大必睇位
問過美國朋友，佢連睇兩次，原因戲打得激，動作快，有唔明位，睇一次消化唔切。朋友仲介紹以下3大必睇位：
1.警車大黃蜂追逐戰
事關狂派如直升機早就出場，但真正博狂兩派第一場正面交鋒，正係呢場戲，所以觀眾特別期待。
2.大黃蜂被人類活捉
大玩男主角同機械人之間的眼神交流，原來機械人都可以演得咁有感情。
3.柯柏文麥加登決戰
如果你係老柯迷就慘了，因為老柯毫無招架之力。但結果怎樣，賣個關子，只可以話就算你睇老變由細睇到大，一時間都會睇唔明，特別係戲中神秘能源方塊，到底係咪能量咁簡單呢？
電影道具eBay有得Bid！
TransformersTimeline
1974
《微星小超人》74年在日本發表。84年美國孩之寶睇中其機械人變形故事，買下版權，變成《變形金剛》。
1984
推出第一代卡通《TheTransformers:Generation1》，分為4季共98集。
1986
首套電影《TheTransformers:TheMovie》上映。
1987
新系列《Transformers:Headmaster》（頭領戰士），共35集。
1988
《Transformers:Masterforce》（隱者戰士），特點是外表與人類無異，卻擁有變形能力。
1989
推出勁日本風格的《Transformers:Victory》（勝利之鬥爭），故事簡單。
1993
《TheTransformers:Generation2》，復活後的麥加登再次登場，挑起戰爭。
1994
第一屆變形金剛大會《BOTCON》於7月在印第安納州韋恩堡舉行。
1996
採用3D技術的《Transformer:BeastWars》，以變身成動物為賣點。
2002
孩之寶玩具在玩具反斗城獨家推出第一代變形金剛復刻版。
2004
變形金剛慶祝20周年紀念，孩之寶推出柯柏文20周年特別版玩具。
2007
真人電影版《變形金剛》上映。
