時間：00年10月29日
地點：澳門
人物：盧慶輝
經過--藝人去夜店消遣，好容易惹到麻煩，盧慶輝00年10月喺澳門夜蒲時俾人爆樽嘅新聞就轟動啦。有消息指當年盧慶輝同謝天華、張耀揚同黃子揚等，一班人去咗澳門別吧的士高作樂，點知盧慶輝搞出個大頭佛。話說盧慶輝喺舞池忘我咁跳舞，由於企唔穩，多次撞向喺舞池跳舞嘅人，其中有幾名女士投訴混亂中俾人摸胸，引起現場疑係黑幫人士嘅不滿，同盧慶輝起爭執，更隨手拎起玻璃樽扑佢個頭同狂毆，事後，盧慶輝需要去澳門鏡湖醫院求醫，縫咗10針就返咗酒店休息。翌日，盧慶輝由父母陪同坐船返香港，當時佢左頰近耳同額頭都貼咗膠布，面腫腫嘅佢戴住漁夫帽，頭耷耷咁出閘。
問到盧慶輝嘅傷勢時，佢好似好輕鬆咁話：「我OK呀，不過care（照顧）咗啲老人家先，畀老人家行咗先啦，遲啲我一定同大家講。」同行嘅盧媽媽就話：「我個仔冇嘢呀，佢不知幾好。」盧慶輝明明塊面貼晒膠布，兩母子仲一齊擘大眼講大話，又一次證明慈母真係多敗兒。形象唔多好嘅盧慶輝，演技又唔見得特別突出，所以喺長江後浪推前浪嘅情況下，近年已經絕迹幕前。
本欄逢周一至周六刊出