我車報員喺香港回歸祖國10周年之前收到風，話曾特首決定放棄老董時代剩落嚟嗰部ToyotaCentury，仲話回歸之前已有新車坐，但線人死都唔肯講嗰部係咩車，而且大家都冚得好密，幾番明查暗訪都Check唔到曾特首換咗架咩車。
點知，就喺回歸後嘅第一個工作天（7月3日），曾特首返到政府總部嗰陣，所坐嘅車已經唔再係Century，而係最新嘅LexusLS600hL，而且仲有唔少記者特登走過去影相㖭！身邊口痕友見到呢單News之後同我講，話曾特首咁浪費，有部Grand得咁緊要嘅Century唔坐，另外一個仲話佢貪新忘舊，一連任就換車，簡直係浪費公帑咁話。
嗱，等我車報員喺度幫曾特首講番句公道說話，老董年代剩落嗰部Century雖然切合佢身份，但都已經有好幾年車齡，兼且部車用緊嘅係一台5.0公升V12引擎，喺家陣油價高企嘅情況下，唔好理佢使唔使畀燃油稅，淨係每次出車油錢條數都不知幾和味；而家陣部LS600hL，雖然用嘅都係5.0V8引擎，但佢仲加埋LexusHybridDrvie混能系統，唔止耗油量低好多，就連排放出嚟嘅廢氣都要少一截，Fit晒佢提倡嘅「藍天行動」啦！車報員仲收到風，話除咗曾特首之外，家陣亦有超過50位用家買咗LS600hL做座駕，睇嚟唔少香港人都支持環保喎！
記者：車報員