以下是的士司機與楊崢的一段對話：「楊小姐，我同我老婆個個星期都睇《蔡瀾逛菜欄》，講真都係睇你咋！」我都係一樣，睇到某集楊崢喺新加坡食胡椒蟹、辣椒蟹食到滿心愜意，個樣冧到就好似邂逅到意中人一樣，然後突然爆出一句：「最啱我蟹后……」好！一於相約她食當造的黃油蟹：「食黃油蟹唔係單單食膏，係食蟹全身縱橫交錯的油與肉……」言之有理，唔似得某些名模扮食家，淨係識講：好食好食！
記者：趙珮倩
攝影：林栢鈞、梁細權
服裝：YvesSaintLaurent
還記得楊崢（Vanessa）在《美女廚房》中的精湛廚藝嗎？煲湯甜、切嘢準、煮餸勁，最近仲跟蔡瀾做埋食家，於3個多月走勻半個地球，去了12個城市覓食。識煮識食又經常周遊列國，食過N種國家的蟹，Vanessa始終對本地蟹情有獨鍾，「屋企係上海人，細細個就開始鍾意食大閘蟹，後來有機會食到好多唔同種類的蟹如：法國睡蟹、澳洲皇帝蟹、美國阿拉斯加蟹等，外國人鍾意凍食，變化唔多，口味比較單調；而中國人有熱食文化，講求新鮮熱辣色香味，有得揀我都會揀食港式蟹，無論薑葱炒、避風塘炒、上湯焗、清蒸、醉蟹我都咁鍾意！」
楊崢喫蟹大法
黃油蟹粉小籠包 每個$40
楊崢評：蟹粉、湯、肉碎的比例做得好平均，一咬落去餡料充滿整個口腔，唔錯！
黃油蟹粉燴生翅 每位$328
楊崢評：翅好足料，同平時食到的蟹粉翅唔同，多咗一陣天然的海水、海鮮味道，感覺好舒服，一啲都唔膩。
黃油蟹粉煎釀帶子 $268
楊崢評：蝦膠好爽口，略嫌黃油蟹蟹粉味濃，蓋過帶子的鮮味。
明閣
地址︰旺角上海街555號朗豪酒店6樓
電話︰35523300
營業時間：11am-2:30pm
6pm-10:30pm
（黃油蟹供應期至7月31日）
市區食流浮山頭手蟹
訪問前，Vanessa好奇地問：「食黃油蟹你唔去鴻星？」去，當然去，事關鴻星的黃油蟹，日日由流浮山取得頭手靚蟹，唔使自己山長水遠「貢」入去，保證唔靚包換，加上師傅創意澎湃，年年都有黃油蟹新驚喜，唔怕食到悶，最啱貪新鮮的香港人。
生滾黃油蟹粥 4位用$288
生劏黃油蟹連膏連油滾至粥底都被染成金黃，一粒鹽都冇落，食到真鮮味。
黃油蟹石榴果 $28/件
外層炸到脆卜卜，入面仍保留住原汁原味的蟹粉鮮味，一口一啖，停唔到口。
鴻星海鮮酒家
地址：尖沙嘴彌敦道83-97號華源大廈1樓
電話：26280339
營業時間：10am-11pm
四季最靚蟹粉
若與黃油蟹相比，Vanessa更愛大閘蟹，「細個時可以一次過食4至6隻，𠵱家貴精不貴多，通常食3隻啦！膽固醇都唔理得咁多，因為又唔係成日有得食。」講到食大閘蟹蟹粉喎，她二話不說：「天香樓！」無他，有50幾年歷史的經典老舖天香樓，一年四季都有上海陽澄湖大閘蟹供應，當中以9、10月當造期的大閘蟹最為肥美。天香樓的蟹粉出名在於只會選用大閘蟹蟹身拆肉，蟹腳統統棄掉，難怪做出來的蟹粉特別甘腴香滑。食蟹粉時記得加一點天香樓自家製的醋，是以三種醋加入冰糖調製，令蟹味即時昇華。
炒蝦蟹
河蝦肉大粒彈牙清淡，撈埋蟹粉炒，隻隻蝦都沾上蟹香，濃淡相配，鮮味無窮，伴埋個原盅蒸的「靚仔」嚟食，一流！
蟹粉拌麵 $360
三百幾蚊食碗麵真係好貴，但當你知道呢度有4、5隻大閘蟹蟹身用來做蟹粉俾你撈麵，心甘命抵。刀切麵煙韌有口感，與甘腴的蟹粉交融，絕配。
天香樓
地址：尖沙嘴柯士甸路18號C地下
電話：23689660/23662414
營業時間：12nn-2:30pm；6pm-10pm
尋找低調的盲蟹
黃油蟹樹大招風，人人爭住食；同樣是呢期當造的大浪蟹（又叫盲蟹），就低調得多，唔係周圍有得食。
盲蟹一般在西貢島嶼岩石邊出沒，蟹爪有鈎，可抓緊凹凸不平的岩石，行動快速，幾大浪打都沖佢唔走，漁民要徒手搏鬥先可以捉到佢哋，唔係個個肯捉嚟賣。
嘩！盲都咁敏捷？海膽養殖場的老闆陳生：「佢哋唔係盲，係我哋客家人叫慣做盲蟹，都唔知點解！」個名點嚟我唔理，淨係知道佢哋雖然蟹仔細細，但絕對係肌肉型，肉質好似龍蝦肉咁爽，鮮甜無比，清蒸最正！
海景漁村（海膽養殖場）
地址：西貢糧船灣東丫村2號（天后廟旁）
電話：27912668/64438101
交通：於西貢公眾碼頭安排街渡，來回每位$50；凡惠顧海鮮套餐則包來回船程。