今日再講新華文軒（811），係第二次，新華掛牌首日（5月30日）已推介，當日收市5.55元，短線目標價7元。5日後再補充一句，可加碼，初步上升目標提升到10元。
6月4日，新華股價最高見6.93元，但低收6.27元，其後1個月，股價都在低位上落，本月3日低見5.79元後，才重上升途，噚日一支大陽燭抽上去，最高7.40元，收7.29元，升10.1%，成交超過2000萬股，街外貨源已收到好亁。
新華係好股，有好多識貨之人，上月大部份時間股價唔升得，好明顯係大戶在壓價入貨，足足收足1個月，而大戶嘅增持行動亦陸續曝光，到現時為止，最大手係OZManagement持9.24%、Arisaig大中華基金持5.05%、滙豐投資持5.66%同惠理基金持5.03%（但在超額配股行使後已降到5%以下），另外社保基金持有9.09%，5大基金已合共持有34%，加上其他未夠5%而毋須申報的，相信基金已揸咗5至6成，日後應會陸續有基金揸夠數而曝光。
大戶增持 貨源歸邊
新華連同超額配股合共發行4.4億H股，發售價5.80元，上市首日就破底，最低5.07元，個多月收集完成，貨源歸邊後，噚日終創出新高，中線仍以10元為目標。新華未來嘅升途唔會清風送爽，估計仍會有頗多反覆，但深信可達標，而以後股價每出現調整，都係低吸嘅最佳機會。
新華係本港首家上市的圖書零售分銷商，以四川省為基地，擁有191家分店，其餘兩家分別位於重慶及西安，由於集團有數十年發行經驗、龐大銷售網絡及知名度，在投標進軍其他省分的教材業務時，會佔有極大優勢。
今次上市，新華集資約23億元，主要用作擴展零售與分銷網絡，以及收購連鎖書店，公司已有優先權收購母公司旗下三州新華書店，而在其他省市的拓展計劃亦已快將落實，日後新華分店增到400至500間時，股價會否翻一番？