南華系大股東吳鴻生千金吳旭茉Jessica自從05年唔喺公司幫手，轉行做大狀後，兩位公子吳旭峰同吳旭洋就接棒打理家族生意，不過除咗幾年前，大公子吳旭峰陪家姐見過傳媒，之後就好似銷聲匿迹，到近日先同細公子吳旭洋再亮相見傳媒。
兩兄弟雖然只係相差一歲，大佬26歲，細佬25歲，不過兩兄弟性格幾極端。華華所見，大公子比較cool，整個場合都冇同華華講過一句說話，屬少說話多做事型。相反，細公子就熱情得多，一提起佢負責嘅瀋陽南華置地廣場，就手舞足蹈，仲解釋得好清楚。
細公子仲冇乜公子脾氣，順得人意，話說南京鼓樓區區長送當地名產雲錦領帶畀佢兩個，細公子二話不說，就除咗自己帶緊嗰條呔，嗱嗱聲換上區長送嗰條新呔，仲全程帶住㖭。細公子咁識做，加上又有大公子睇住，睇嚟吳生都放心將盤生意交畀兩兄弟打理。
[email protected]