有人話：「有啲所謂投資專家，其實自己都係負資產，又點可以教你發達？大部份股票行經紀唔係為你賺錢，而係為自己賺佣金，所以投資者唔應該盡信佢哋嘅意見。」duwah喺《MSN討論區》問其他網友：「你哋會唔會聽基金經理嘅話？定係自己決定點樣投資？」
mj129講：「我聽基金經理嘅意見，結果我嘅投資組合升咗好多，由5年前嘅6.6萬美金（約51.5萬港元），升到𠵱家13萬美金，賺咗成倍。」fpp反駁話：「如果你當初買新興市場嘅交易所買賣基金（ETF），呢5年可以賺到3倍㖭呀！」
可以參考 唔會盡信
Pennyandpoundwise講：「我會聽投資顧問嘅話，但唔會盡信，因為佢哋有時會因為個人理由，推介某種投資策略，未必啱我。」mickarch講：「我睇過40幾本投資書，自己學投資，呢幾年試過幾次『睇錯市』；不過，交多幾次學費，將來就會叻啲，唔會一錯再錯。」
FredinWi：「計我話，投資一定要瞓得着，如果瞓唔着，我就會減持；我亦唔會淨係買一兩隻股票，會揀比較穩陣嘅基金；更唔會俾市場嘅小道消息影響投資決定。」
美國聯儲局前主席格林斯潘都試過睇錯市，96年已經警告美股「非理性亢奮」，但結果美股到2000年先見頂。