Car通：包圍+尾冚越玩越型<br>蠱蠱惑惑揸雙龍

Car通：包圍+尾冚越玩越型
蠱蠱惑惑揸雙龍

做咗新牌仔無耐嘅老死阿Ken，急不及待話要出車，佢一向要威兼有計，自有一套揀車態度。今日新車出巡，一睇，係韓國柴油PickUpActyonSports最新版本，果然唔隨波逐流。外形醒目夠搶唔在講，佢仲話經濟實惠又好力，最重要係內櫳又大又舒服，最啱約埋女友然後……嘩，見佢蠱蠱惑惑，究竟搞邊科？

記者：黎頌詩　
攝影：陳偉強　
Model：Suki、Ken

執少少增運動感

韓國車、柴油驅動，加埋PickUp小Truck，通通都唔係香港用家嘅揀車主流，不過C記絕對同意Ken嘅睇法，雙龍嘅ActyonSports的確揀得過；最吸引無疑係柴油驅動，比電油慳唔少，粗略估計大約6毫半就可以行一公里，比起用電油平成半，成日用車嘅話都咪話唔襟計。
講到呢類小Truck，近年更加係人氣勁升啦！勝在用途夠多，全家去Shopping、去旅行，運埋貨都仲得，咁先夠抵。最緊要係連個樣都睇得嘛！講真，無論架車幾好用，但係一副勞工Look嘅話，C記就點都唔Buy㗎！搞到去Shopping人哋就以為你去送貨，點算？ActyonSports本來個樣已經係幾醒，新版仲姿姿整整再加型仔陳設，車頭多咗防撞、左右兼車尾腳踏，貨斗又可以加埋冚。少少嘢，運動感即時提升唔少，難怪要威要型嘅Ken都睇中佢。

■美色當前點都要型，最緊要係新牌仔一樣可以操作得心應手無甩轆。

■加腳踏後上落更方便，而且運動感大增。

■貨斗除咗運貨仲可以做啲乜？排排坐睇飛機都得！

尾冚擋視線

今次新版嘅ActyonSports，變身重點純屬外觀，至於內櫳、性能一切照舊，保留咗原來嘅優點。由於ActyonSports嘅車身比較長，而且夠高，所以唔會有一般PickUp兼顧得尾斗容量、內櫳就變得超窄嘅缺點，即使後排座位都比想像中闊落，中間位都照顧到，舒適度無疑勝過唔少私家車。睇阿Ken蠱蠱惑惑，點都要同女朋友仔留喺車內卿卿我我就知啦！
操控台鋪排以簡潔取勝，唔玩花臣，操作簡易，其實好啱新牌仔。睇埋尾斗，419kg載重量，今次加埋冚就更骨子又安全。美中不足嘅係，當C記坐上司機位準備試車時，發覺加咗尾冚後，由於有一定嘅厚度，會阻擋部份尾窗，後方嘅視野會受到影響，需要時間適應。

■車尾腳踏裝飾意味較濃，不過加咗真係型好多。

■最搶係頭燈，獨特又夠氣勢，夠惡。

■貨斗前方嘅罩，亦係阻礙後方視線嘅元兇之一。

■貨斗容量不俗，加尾冚增加安全性，更切合香港環境。

新一代勝房車

曾經有很長的一段時間，由於環保埋由，政府不再發柴油私家車牌，加上柴油車嘅爆發力同寧靜程度，都遠不及電油驅動嘅汽車，所以一般人都唔會考慮以柴油車代步。直到近年，柴油車技術已不可同日而語，有車行嘅柴油車甚至登上賽車場，可見爆發力已經唔再係弱點。今日C記試揸呢架ActyonSports，可以話完全體現新一代柴油車嘅實力。
令人震驚嘅，唔單止點火時無傳統柴油車嘅雜音，行車時引擎比部份小房車更為寧靜，操控起嚟相當柔順，自動波箱初哥都搞得掂。不過柴油車由於避震較硬淨，所以穩定性始終不及房車，C記反而覺得震震吓幾過癮。仲過癮嘅係一入油站，即時吸引幾位入油哥哥走埋嚟研究，個個都猛讚佢型，搞到我連虛榮都有埋。無嘢講啦，揸咗呢轉，C記真係無辦法唔即時成為柴油車嘅新Fans！