𠵱家啲上市公司，興起搞「影子計劃」，即係畀學生哥跟住集團高層，睇吓高層每日點樣做嘢，呢啲咁難得嘅機會，唔係人人都有份㗎。
華華記得舊年滙豐搞咗「影子大班計劃」，今年初新創建就搞「影子高層計劃」，𠵱家輪到上市時裝連鎖集團I.T。
不過，I.T今日推出嘅「影子計劃」，唔係安排學生跟住高層，而係畀50個中四至中六嘅學生哥，喺集團總部接受顧客服務培訓後，到旗下33間店舖做集團嘅「影子員工」。華華想知班「影子員工」有冇糧出嘅呢？I.T擔唔擔心俾人話請廉價勞工？
學生哥逛公司買靚衫，左揀右揀叫sales幫手搵就試得多，但係掉番轉就唔係咁多人試過，係咪忍受到都唔知。
I.T培訓時可以要班影子sales日日背劉華金句──「今時今日咁嘅服務態度唔得㗎」。
[email protected]