家陣咩都興DIY，尤其自己買啲木板、裝番幾粒螺絲，就成為吊櫃或層架，不過入到五金舖，淨係螺絲都有成十幾種，有時真係唔知邊款好。睇到最新一期《選擇》月刊嘅「生活百科」，提及好多安裝吊櫃安全要訣，等各位姊妹唔使整親對靚手。
平日成日聽開嘅「爆炸」螺絲原來分為「平爆」同「拉爆」，後者可負較重物件，唔好處係牆上插咗外露嘅螺絲柱，難以清除。啲裝修師傅建議，一般喺吊櫃底板嘅平面四角嘅上下左右約五厘米位置，釘上四口爆炸螺絲作固定，如果櫃身靠牆或天花，可以用同一方法喺各平面上釘上四口螺絲分散重力，咁會更加穩固。不過，如吊櫃較長身，載物又重，或者可以喺背板上下釘上各三口「爆炸」螺絲穩定櫃身。師傅又提醒，如果吊重物，背板厚度最好有12毫米。
逢周一至周四刊出