1小時曬相夠快？對於心急嘅人，仲要喺街等成粒鐘先有相睇，絕對會SayNo！不過對於廣大攝影玩家，行街一邊Snapshot嘅同時，只要見到Kodak最新推出呢部PMG4自助曬相站，只要喺屏幕㩒幾㩒，就可將相片印出來，全程只需8秒，真係爽快過人！
記者：許福合
攝影：林栢鈞、陳偉強
Model：Zukmi&Fion
化妝：Meegan
自助曬相Step-by-Step
1.入相
第一步當然係入相，從相機、手機取出記憶卡插入曬相機，支援CF、MicroDrive、SD、MiniSD、xD及MS，你亦可以用手機經藍芽過相。
2.篤芒選擇
講操作PMG4易過提款機，PMG4會自動讀取卡上的相片，並會一次顯示6張相。
3.相片大小
揀啱相就可以決定相片大小，最大可以去到6"×8"，最細亦有2"×2.8"選擇。
4.加色水
有時因為相機或環境令相片未能符合要求，PMG4都可以畀你調整，相片大小、顏色及光亮度等都可任意設定，亦可加上文字！
5.趣味相框
想令相片更特別，可以利用PMG4內置相框功能，將相片加入相框，不過記得調校相片大小同位置，以配合相框款式。
6.8秒即出
當完成所有設定，按下印相鍵，大約只需等8秒左右，PMG4就可以出到相。
快過1小時沖曬店
我自問一向好心急，所以當數碼相機興起，自然愛到發燒！不過曬相一向係我天敵，當初用噴墨打印機，牛龜咁慢、墨水又貴，好快被我遺棄；後來興起嘅數碼曬相，唔少舖頭都可做到1小時交貨，勉強可接受，不過最理想梗係唔使等！
呢個唔係夢想，Kodak新出嘅自助曬相站PMG4，由輸入相片到效果調節都係自己話晒事，想個天變成紅色都得，最啱我呢啲鍾意Special嘅人。不過最重要都係全程只需8秒就出到4R相，無論我幾心急，8秒絕對可以等得！
防水防曬保存易
PMG4之所以有咁高速度，全因佢用上熱昇華打印技術。不過市面上出現過的熱昇華打印機，一般都無咁高速度，PMG4則是採用Kodak技術，除咗快之餘，我仲留意到由PMG4曬出來相片，配合XtraLife相紙，可以有防水防曬嘅效果，收藏保存都比較容易！
此外，拎相去曬相舖，通常都係「原裝印製」，PMG4玩法就唔同，曬相前可以加入文字、相框、黑白懷舊等效果，更有除紅眼、放大縮細、調校光暗等效果，仲簡單過喺屋企玩《PhotoShop》！
相片範例
$1.8一張相，抵唔抵？
用家最關心的，除咗相片質素、速度外，當然係價錢，由於PMG4運作模式唔同一般汽水機，價錢會由商舖自行決定，所以唔同地點可能會有出入。而Kodak官方嘅建議收費，4R要$1.8-$2.5一張，相對於一般曬相舖由幾毫子到$1.3左右，PMG4價錢自然貴咗啲。不過一般曬相舖通常要曬10張或以上，仲要等1小時先有相睇，PMG4賣點係只曬1張都無問題！加埋即時有相攞，所以抵唔抵，要視乎你的曬相數量。
質素各有千秋
好多人會問「啲相究竟得唔得？」我哋專程用同一張相片，各自拎去PMG4及1hr曬相舖曬相，比較各自相質。
1hrVSPMG4
曬唔曬？
強（攝影發燒友）
其實現時數碼曬相，已經令相片無咗好多嘢睇，質感實感都放棄咗，從PMG4或曬相站出來的相片，只能重現拍攝時一半畫面，所以我覺得兩者都無分別，一樣無嘢睇！
Tommy（DC玩家）
我經常玩Snapshot影落唔少相，不過好少拎去曬，因為好多都係隨便影。不過有咗PMG4，如果影到得意嘅相，我會拎一兩張去曬，夠方便！
Karl（手機Snap友）
我多數用手機影吓相，所以好少拎去印。我最鍾意PMG4可以用藍芽傳相，好方便，而且仲可以加相框，張相就會有趣好多。
PMG4自助曬相站將會出現喺KodakExpress店或熱門旅遊景點如廸士尼、澳門觀光塔等。
（查詢：26117238）
