本地長途廉價航空公司甘泉航空開咗檔九個月，先後開辦倫敦格域同加拿大溫哥華兩條航線，市場反應不俗，甘泉見發展勢頭幾好，打算開埋澳洲悉尼同墨爾本線，繼續同本地大佬國泰航空競爭，等啲旅客多一個選擇。
最快明年開通
甘泉已經向政府空運牌照局申請經營悉尼及墨爾本嘅牌照，政府上星期五刊憲，若然十四日內冇人反對，牌照局通常喺幾個月後發牌，甘泉申請埋航權、機場飛機升降時段等，如無意外，最快明年就開得成呢兩條線。
國泰𠵱家每日有三班航班飛悉尼，兩班飛墨爾本，澳洲航空同維珍航空（只飛悉尼）都有飛，如果甘泉加入戰團，旅客可多一個選擇。
而且甘泉打正「廉價」旗號，減價戰似乎在所難免。無論點，市場有競爭，得益嘅都係消費者，機管局又可以做多啲生意，歡迎之至。
[email protected]