如果今日，孫柏文同你講，勸你唔好做一樣會影響你下一代嘅嘢，你會唔會聽？
今時今日，一個30歲以下嘅人，如果想research一啲嘢，第一步一定係上網睇。甚至係一定上Google。
早排有間網上招聘公司嘅總裁，叫做JasonGoldberg，雖然坊間傳聞話佢會大幅裁員，不過佢死都唔認，仲公開批評啲「放風人」。點知，批評「放風人」之後幾日，該公司真係大幅裁員。霎時間，鬧總裁「廢柴」嘅文章百花齊放。總裁之後都知出事，盡力道歉希望可以擺平風波。不過到今時今日，只要你上Google，打JasonGoldberg，喺頭十名搜尋結果當中，仲有講佢點樣講大話嘅文章。
有互聯網之後，冇嘢可以銷聲匿迹，五年、十年、二十年之後，只要有人googleJasonGoldberg，都會知道佢今日講過大話。喺咁嘅世界裏面，你絕對可以做衰嘢，不過就要有心理準備，出得嚟行，遲早要還。仲唔係得你一個還，之後十年、二十年，你嘅仔、孫，都仲會還。
如被李國章蹂躪
特區有間上市公司，叫做榮豐（063），早排出通告，話要大玩「財富轉移」。孫柏文絕對唔係第一個講呢單嘢嘅人。基本上，大股東將會攞啲「廢柴」新加坡物業注入榮豐，同埋將榮豐啲特區貴地皮注入冇上市嘅公司，跟住一比一咁分畀股東。下個禮拜7月25日畀啲「獨立」小股東投票決定。
注乜嘢入榮豐，小股東要被攤薄幾多我都冇氣鬧。不過，將貴地皮注入一間冇上市嘅公司？跟住一比一咁分畀股東？如果股權真係冇物質上嘅改變，做咁多嘢為乜？作為一間冇上市嘅公司嘅小股東，有如被李國章蹂躪。
我好尊敬嘅何車先生講過：「榮豐……改組，送不會掛牌的債券。派送不會掛牌的東西，不受歡迎。勝敗炒家常事，建議止蝕離場。寄語上市公司揸弗人，送甚麼都可以，叉燒飯亦無妨，但不要送不會掛牌的無報價東西。」同樣我好尊敬嘅股醫查博士，仲要一矢中的咁話：「榮豐……其重組手法值得關注，小股東一是反對，一是沽貨。」
就係呢啲手法令特區蒙羞，削弱特區金融業競爭力。如果係特區人呃特區人都算，不過如果係新加坡人嚟特區做呢啲嘢，大家又點睇？
請轉載呢篇文章
大家只要睇榮豐同佢母公司嘅年報，都應該會推斷佢係家族生意，管理層係姓鍾四兄弟。亦即係話，大家可能會覺得上述從商嘅手法，反映佢哋嘅「種」，有乜嘢心態。
今日我嬲嘅，唔係證監同港交所廢柴，連呢啲手法都批准。
今日我嬲嘅，唔係坡佬嚟搞寸特區。
今日我嬲嘅，係因鍾斌銓CheongPinChuan,Patrick，鍾金榜CheongKimPong，鍾燊榮CheongSimEng，鍾斌盛CheongPinSeng，可以完全唔顧佢哋下一代永遠永遠都要負起佢哋商業行為嘅後果。
今日要中英文名都出晒，係因為我相信好多曾經被上市公司大股東，咁樣「對待」嘅小股東股民，會轉載、連結到呢篇文章。到時候，如果佢哋姓鍾嘅後裔要做生意，搵拍檔，啲準拍檔一google佢屋企，就會知道佢哋家族嘅從商心態。回頭是岸。
金手指網誌： http://phatdat.blogspot.com
