新馬季還未開始，馬主W就話想拉隻馬轉倉。佢隻馬上季跑咗幾次，未贏過頭馬，季尾先至入過位置。本來馬主W嘅要求好低，但試過兩次話有機會贏，輸到佢面懵，有一次話信心一般，突然臨場落飛，當然唔係馬主W嘅飛啦，因為佢係小注怡情嘅信徒，但隻馬竟然表現勇猛噃。
馬迷L聽到，潤番一句：「人哋大風大雨之日，晨早起身操馬，辛苦到極，點會咁易話畀你聽呀？」自己辛苦啲，去睇晨操，親自掌握情況得唔得呢？馬迷L話：「馬主邊有時間吖，我已經半退休，前幾個月朝朝去馬場跟一位退休人士學嘢，果然贏過幾次勁嘅。退休人士精通電腦分析，每早四點到沙田馬場，風雨不改，返到屋企就將所見到嘅晨操馬印象，輸入電腦，每次跑馬就下載所有經過整理嘅資料，講過幾次心水貼士畀我聽，準繩度好高！」咁巴閉，可以搵到食喎，證明「力不到不為財」呢句說話係啱嘅。
馬迷L話：「有一個人仲勤力，係你我都估唔到嘅，就係前馬會賽馬事務執行總監，現行政總裁應家柏，我喺沙田見過佢睇晨操，跟住返工，佢嘅一日工作時間好長啫。」應家柏係德國人，具備傳統苦幹精神，直情係工作狂，一位前馬會僱員曾對左丁山講過：「我每次返工，都見到EB返咗先，冇一次可以早過佢，而且佢又係好遲都未走嘅，放工冇一次早過我。」有如此老闆，下屬焉敢偷懶。咁勤力工作，通常反映咗某人對自己份職業有好大熱誠，百分之二百投入感，個人興趣與職業融合為一。如果你對份工冇興趣，返工當苦差，邊會有心機同公司捱吖。
左丁山自幼鍾意睇報紙雜誌，鍾意寫文，喜歡辯駁。估唔到竟然轉工多次，最後轉到以睇報紙雜誌，寫文為搵食工具。好多人以為左丁山工作時間太長，好辛苦，事實上係嘅，但因為個人興趣與工作合而為一，一啲都唔覺得太辛苦，只係覺得搵錢難與班賓架老友相比啫。不過工作辛苦之餘要有地方發洩情緒，左丁山就學足應家柏，鍾意睇跑馬，不同之處係，左丁山會輸錢，應家柏一定唔輸，因為馬會職員唔可以投注！